Swipe, scroll, suko!

Nakabantay ba mo nga ang mga kabatan-onan karon dali kaayo masuko o dali ra kaayong mapungot? Hinuon, dili tanan, apan kasagaran.

 Kini nga kinaiya dili lang tungod sa personal nga batasan, apan resulta sa sobra nga exposure sa teknolohiya ug gadgets sa sayo pa nga edad. Ang kabataan karon nagdako uban sa tablet, ug kadaghanan wala na’y limit sa oras nga gigahin niini.

Matud sa usa ka pagtuon sa University of the Philippines Research Department, ang mga gadgets nahimong kauban bisan sa labing gamay nga mga bata. Gikan sa 2 hangtod 36 ka bulan, daghang bata ang nakagamit sa digital media sulod sa duha ka oras matag adlaw, bisan pa nga dili pa kini angay alang sa ilang edad. Kabalaka kaayo nga ang paggamit sa devices magsugod pa sa edad nga halos dili pa sila makalakaw o makasulti ug magpadayon hangtod sa kabatan-onan.

Mas dali na lang pahilomon ang bata pinaagi sa pagpatan-aw sa “YouTube,” labi na kon “Cocomelon” ang gipa-salida. Mopahilom dayon ang bata ug usahay dali ra kaayo masuko kon wala. Tinuod, lahi na gyud ang pamaagi sa karon nga henerasyon sa mga ginikanan. Ug dili ikatingala nga bisan ang mga bata nga wala pa’y usa ka tuig, kabalo na kaayo mo-swipe, mo-scroll, ug dali ra kaayo masuko.

 Uban pa ani nila magkayoring ug pagbatbat sa mga pulong nga dili masabtan. Unsa man intawn ang pasabot anang mga banat na “Tung Tung Sahor”?

Sa kabatan-onan, kanunay nga paggamit sa sosyal medya ug gadgets nagdala sa problema sama sa pagkabalaka, ubos nga pagsalig sa kaugalingon, ug stress. Sa tanang edad, sobra nga paggamit sa screen makadaut sa tulog, relasyon, ug relasyon sa pamilya. Dili lang kana, mahimo usab kini hinungdan sa dugang nga mga problema sa panglawas sama sa mga sakit sa mata ug mga sakit sa pangisip.

Ang panahon sa teknolohiya naghatag ug daghang kahigayunan sa pagkat-on, apan kon dili matimbang, kini mahimong kadaot. Pagsukod sa paggamit, tabang sa ginikanan, ug kahibalo sa husto nga paggamit sa gadgets kinahanglanon gyud aron mapugngan ang pagbati sa panghunahuna ug masiguro nga ang teknolohiya makatabang, dili makadaot!