Luwas nga paggamit sa pabuto

Tungod kay dili man gyud mapugngan ang mga tawo nga mogamit og pabuto, dunay mamaligya ug duna usay mamalit, subling gipahinumduman sila sa atong kagamhanan nga mag-amping aron dili mabiktima sa mga gamiton nga pabuto.

Kada tuig nalang gyud balik balik kining maong isyu busa gikinahanglan nga isilsil ang alimpatakan sa mga tawo ang posibleng mahitabo kong magdanghag.

Bitaw sa tinuod lang mao naman gyud kini ang nabatasan kay bisan kadtong walay kwarta mangita man gyud og pamaagi aron makadagkot gyud niining mga firecrackers.

Lahi ra man gyud kuno kong naay mopaka paka nga pabuto kay sa torotot ug mga takob sa kaldero.

Dunay mga listahan sa mga gidiling pabuto murag miabot sa 30 ka mga matang sa mga kusog nga pabuto nga higpit nga gidili kay seguradong maghatag kini og peligro sa mga mabuthan.

Apan nganong duna pa man gyuy maghimo og ingon niini nga matang sa firecrackers nga makapatay naman diay kini?

Unta sa mga masakpan nga mamaligya og ingon niini ka delikadong matang sa pabuto pahamtangan sila og dakong silot aron dili na gyud mohimo pa og mga deadly firecrackers.

Sa mga nanginabuhi og ingon niini, kamo nalang unta ang mag-regulate sa mga pabuto kay nasayod na kamo sa sangpotanan ugaling magsubi subi kamo sa gilatidad nga regulation sa mga awtoridad.

Dunay mga compliant in fairness nila pero duna sad gyuy gahi’g ulo nga mopalusot.

Kadtong mga ingon niini nga matang sa tawo angayan nga duklon o unayon sa pagpabuto sa iyang dunggan aron makadungog gyud nga sayop ang iyang gibuhat.  Dili lang makadaut sa lawas sa tawo kon dili makaamong sa panginabuhi sa mga nagtinarong sa pagpamaligya og mga firecrakers kay ma-generalize naman silang tanan.

Kaniadto magsige ko og balita nga nag awhag sa mga tawo nga dili nalang mogalit og mga pabuto pero dihang akong nahinabi ang mga nangninabuhi niini akong nasabtan ang ilang kahimtang nga mao kiniy gihimo nilang panginabuhian, gikuhaan sa pagbuhi sa ilang pamilya, gipaeskwela ug sa laktod nga pagkaestorya dako kaayo og natabang kanila ang ilang pagnegosyo og mga pabuto.

Nasabtan nato kini apan angayan nilang hinumduman nga dakong risgo busa sila na mismo ang magbantay sa ilang isig ka tawo nga naghimo og ingon niininga magtarong sila aron molungtad pa ang panginabuhi nga ilang gisaligan sa ilang pamilya.

Sa mga pumapalit nga dili gyud makontento og saba saba lang sa mga takob sa kaldero ug gusto gyud og buto buto, seguradoha lang nga luwas ang inyong pamaagi, mga dunay buot na kamo dili na kinahanglang bantayan sa mga awtoridad kay kamo mismo nasayod na unsay makadaut ug unsay makaayo.

Kining tanan anaa ra gyud sa atong pag amping alang sa atong kaluwasan ug kaluwasan sa tanan.