Way ghost project dinhi

Gitataw sa kadagkoan sa kagamhanan nga dinhi sa Cebu wa pa sila makasigpat og “ghost infrastructure project” apan dunay mga project nga “substandard.”

Human sa Bagyong Tino, gipadala dinhi sa Cebu ni Presidente Bongbong Marcos ang team nga gilangkoban nila ni DPWH Secretary Vince Dizon, retired general Rodolfo Azurin Jr., Undersecretary Arthur Bisnar ug Baguio City Mayor Benjie Magalong.

Gisuta nila kon nganong nahitabo ang grabeng lunop ug pag-awas sa Mananga River, Butuanon River ug Cotcot River nga misangpot sa pagkakalas sa daghang kinabuhi sa mga tawo nga gibanlas sa baha.

Natan-aw sa team nga dunay mga opisyal nga nagkuwang sa ilang serbisyo kay wa sila makahimo og proyekto aron unta mapugngan ang kusog nga bul-og sa tubig gikan sa kabukiran paingon sa patag kon may kusog nga uwan.

Kini maoy hinungdan nga dunay mga opisyal sa kagamhanan nga iapil pagpasaka og kaso, uban sa mga contraktor sa mga proyekto nga klaro kaayong substandard, kun wa masubay sa design and specification nga gihimo sa DPWH. Unya, kay ang DPWH duna may project engineer ug mga inspector nga mosusi sa mga proyekto, ug kay gi-approve man nila ang substandard project, kining mga tawhana iapil sa pagkiha.

Matud pa nga dunay 54 ka flood control projects nga kantidad og P4.8 billion nga gigasto sa Mananga River Basin gikan sa tuig 2016 hangtud sa 2025.

Ang dakong pahat sa kantidad gigasto gikan sa 2022 ngadto 2025 ug ang QM Builders nakakuha niini og 28 ka proyekto nga nagkantidad og P3.24 billion.

Sa Butuanon River Basin, 60 ka proyekto nga kantidad og P4.55 billion gipatuman sa sama nga mga tuig, ug ang ZLREJ Trading and Construction Corp. nakakuha og 17 ka projects kantidad og P1.4 billion.

Ang Cotcot River Basin dunay 16 ka flood control projects kantidad og P1.36 billion, ug ang 91 percent sa pundo nagasto sa mao gihapon nga tuig, 2022 ngadto 2025. Siyam ka proyekto ang nakuha sa VSP Structure Ventures Corp. kantidad og dul-an sa P687 million.

Naagni si Presidente Marcos sa pagpasusi niining maong mga proyekto kay miabot og 96 ka kinabuhi ang nakalas, ug duna pa gani missing, tungod sa Bagyong Tino nga miguba sa mga 5,000 ka kabalayan.

Hinuon, pwerteng kusoga gyud sa uwan sa maong bagyo, kay bisan didto sa ubang dapit, sama sa Canlaon City, ang ilang karsada didto nahimo man usab og daw sapa.

Sa Butuanon River, ang tubig gikan sa tampi sa sapa, mitubo pa og mga duha ngadto sa tulo ka dupa, ug gihulagway sa uban nga usa gyud kadto ka katalagman.