Pagpamalandong matag Domingo

Maayong Balita

Ang ebanghelyo nato karong dominggoha nagsaysay sa paghulagway ni Jesus kang Juan Magbubunyag nga nabilanggo niadtong tungora. Nagpadala kini og mga sinugo pagpangutana kun si Jesus ba ang ilang gipaabot o magpaabot pa sila og lain.

Ang atong Ginoo wala motubag og direkta sa mga pangutana hinunoa iyang gihulagway ang iyang mga Milagro nga gipanghimo kuyog sa iyang mga pagtulon-an.

Mga Milagro nga nagpahinumdom nga ang tanang mga hitabo kaayohan ug kalingkawasan timaan lamang nga anaa na ang Mesiyas.

Kasinatian

Ning nagsingabot nga pasko sa pagkatawo sa atong Ginoo gipahinumdoman kita nga padayon ang panlimbasog aron mahatagan og katumanan ang proyekto sa katukoran sa gingharian sa Dios dinhi sa yuta. Kun kita tinuod nga nahigugma sa Mesiyas ato siyang tumanon ug atong sundon ang iyang gitudlo.

Lakip na niini ang pagtabang aron daghang mga tawo ang makakita sa kamatuoran ug daghang mga tawo usab ang makadungog sa mga malaumong pulong sa pagmaymay.

Lihok

Dili kita ang Mesiyas apan diha sa atong pag-abin sa iyang kawsa kita dako og kahimoan aron sa ingon moabag sa kawsa sa atong Hari ug Mesiyas nga Taliabot na!

Pangamuyo

Tanan: Ginoo unta mamahimo kaming malipayon sap ag-unong kanimo sa imong misyon alang sa katawhan nga gihigugma mo pag-ayo. Himoa ang among Kalipay ingon nga mag-agad sa imong kalipay. Amen.