EDITORYAL - Alternatibong transportasyon

Karong sunod buwan, Enero sa sunod tuig gipaabot nga iimplimentar na gyud sa Land Transportation Office ang pag-impound sa mga e-trikes ug e-bikes nga magdagan sa mga national roads.

Niadto untang petsa uno ning buwana (Disyembre) kini ipatuman, apan tungod sa kalanog sa mga nagreklamo kontra ani, wala mahinayon.

Ang LTO miingon nga ila pang balikan og tuon ang Electric Vehicle Industry Development Act ug ang implementing rules and regulations niini.

Daghan ang misaway sa LTO ug sa Department of Transportation human nila gianunsyo ang pagpatuman ilang IRR nga pwerteng sukwahia sa unod sa EVIDA Law.

Gani basi sa EVIDA law di kinahanglang iparehistro sa LTO ang mga light electric vehicles (LEVs)  ug pwede silang makadagan bisan asa nga dalan.

Apan ang IRR sa LTO nagmando nga did-an sa mga national roads ang mga LEVs. Kani rabang mga LEVs gigamit kining alternatibong pang transportasyon sa mga ordinaryong Pilipino.

Imbes nga proteksyonan ug palambuon ang paggamit og mga renewable energy powered mode of transportation sama anang mga e-bikes ug e-trikes pangdakpon naman hinuon.

Tungod sa EVIDA Law mas daghan pang mga ordinaryong pamilyang Pilipino unya ang mogamit na og mga LEVs.

Kun mosaka ang demand, modaghan ang mamaligya niini ug duna nay mahitabong kompetisyon, dili lang panindotay kondili pabaratuhay, maayo kini para sa tanan.

Gawas nga makadaginot sa gastos kay dili kinahanglan og petrolyo, makatabang pa hinuon kini para mamenusan ang carbon footprint o polusyong gikan sa mga sakyanang nigamit og petrolyo aron modagan.

Dili gyud ikalimod nga daghang nigamit aning LEVs ang mga iresponsable kaayo sa karsada. Daghan ang magpataka lang og suot-suot  ug pakusog og padagan diha sa dalan.

Anhing dapita na unya mosulod ang gahum sa mga local government units, pwede kaayo nila nga i-regulate ang paggamit aning mga LEVs sa kadalanan basta dili lang gyud did-an.

Tugotan silang makadagan sa mga kadalanan basta naa lang sila sa luwas nga mga lanes sama anang mga ekslusibong bike lanes.

Dapat hugtan sab ang pagbantay batok sa mga malapason aron madisiplina gyud ug mapuslan ang maong EVIDA Law para sa mga Pilipino.