EDITORYAL - Anti-POLITICAL Dynasty law

Human sa pagbutyag sa mga kurapsyon sa flood control projects sa gobiyerno, karon gipakuratan na sab ni Presidente Ferdinand Marcos Jr. ang katawhan, sa iyang pagmando nga himuong prayoridad ang upat ka mga balaudnon nga makatabang sa pagpakgang sa kurapsyon sa nasud. Ang pinakabida niini mao ang Anti-Dynasty Bill nga pila ka dekada nang nag-ungot sa kongreso. Ang political dynasties gidili gyud unta subay sa Konstitusyon.

Apan sa mga probinsiya, ang mga posisyon gikuptan sa mga managtiayon, mga anak, ig-agaw, pag-umangkon, mga apo, bayaw, umagad, managsuon ug uban pang kadugo.  Sa Senado, pila ka senador ang pulos managsuon, mao sab ang sitwasyon diha sa Ubos Balay Balauranan.

Sa ila ra magtuyok-tuyok ang gahum, sila ra say nakahibalo kun unsaon pagbahin-bahin ang ilang kurakutong pundo sa katawhan.

Sala sab ni sa katawhan, magsige lang gihapon og botar ani nila kay gidawat nila nga wala na silay laing kapilian, apan pagkatinuod, gibaligya nila ang ilang boto.

Ang pamilya sa presidente usa sa pinakadako ug pinakakaraang political clan sa Pilipinas. Ang anak ni PBBM mao si House Majority Leader Sandro Marcos, ang iyang ig-agaw mao si kanhi House Speaker Martin Romualdez, ug iyang maguwang si Senador Imee Marcos. Gawas pa niana, daghan pa silang mga kaliwat nga naa sa pwesto sa Ilocos Norte.

Sa pamilya ni Bise Presidente Sara Duterte, iyahang igsuon si Kongresista Paulo Duterte, ug pag-umangkon nga si Rep. Omar Duterte, ug Pwersa nga Pilipinong Pandagat Party list Rep.Harold Duterte, u gang kasamtangang naglingkod nga mayor sa Davao City nga si Vice Mayor Sebastian Duterte ug uban pa nga naa sa konseho.

Gawas sa anti-dynasty bill, gimando sab ni PBBM nga iprayoridad ang Independent People's Commission Act, Party-list System Reform Act ug ang Citizens Access and Disclosure of Expenditures for National Accountability (CADENA) Act–pulos kini mga balaudnon nga makapakgang sa kurapsyon.

Ang dakong pangutana ni Mamayang Liberal Party List Rep. Leila De Lima,  nganong dili man “certified urgent bills” ang mando ni PBBM nga kinahanglan man kaayo kini karon sa nasud tungod sa grabeng kurapsyon. Ngano bitaw no? Laing pangutana, mosuporta kaha ang mga magbabalaod ani?