Salanay hunter sa Sugbo

Nahimamat nako didto sa Lungsod sa Badian kagahapong adlawa si Bonifacio Jomio, usa ka tour guide, mananagat, mananggiti apan mas naila siya karon isip salanay hunter. Unsa man kining salanay? Kini ang crown-of-thorns starfish nga dangan o pesti sa mga corals ilabi na kong modagsa kini.

Ang mga corals mahinungdanon kaayo alang sa mga isda kay diha sila mangitlog ug magpasanay ug kong madaut sila tungod sa mga salanay maapektohan ang fish production.

Sa una walay nagpakabana sa pagpuo sa mga salanay hangtud niabot si Bonifacio kinsa maoy nag inusarang hunter sa mga piste sa corals gamit ang suka gikan sa lubi nga maoy iyang ipang injection sa mga crown-of-thorns starfish nga maoy makapatay sa mga dangan sa dagat.

Dili bastabasta ang pagpuo sa mga salanay kay delikado usab kaayo  kong makasaghid sa panit sa tawo kay makamatay ang lala niini kong dili matabang ang tawo, delikado dili lang sa corals apil ka sa kinabuhi sa tawo ang naasoy’ng matang sa starfish nga anaa sa midyo lawom nga bahin sa dagat.

Kong matunok ang tawo sa salanay mosangpot sa pagkadugta nga sama sa nalanay nga plastik ang parte sa lawas nga matunok niini maong gotawag kini og salanay.

Sa mga wala kaayo masuhito sa mga mananap sa dagat sama nako ayaw gyud kompiyansa kay basin dili ta kabantay nga salanay na diay to ang atong nahikapan o natumban pastilang delikadoha. Bitaw mas maayong mag amping.

Ang pagpamatay sa mga salanay ang gihimong content ni Bonifacio sa iyang social media ug nakaani og daghang reaksiyon. Daghan ang nakauyon sa iyang gihimo ilabi na kadtong nasayod sa dautang epekto niini sa coral reef maong duna usay nagpadala og mas dako nga syringe pangtusok sa mga salanay diin didto ipaagi ang suka.

Sa usa ka adlaw makapatay siya og 50 ka salanay ug makahurot og ginalon nga suka nga iya usab pinalit. Kinaigalingon niya kining gibuhat aron masanta ang dangan nga naghulga sa panginabuhi sa mga mangingisda ug sa kinabuhi mismo sa mga tawo.

Sa pagkakaron, nag-inusara pa si Bonifacio nga hunter ug usahay kong dunay operation ang taga BFAR ug DENR  kuno mouban siya. Kakugi ug dedikasyon ang gikinahanglan aron makapadayon sa iyang adbokasiya, sa ka luag sa dagat dili gyud kini katandog ang gihimo sa lone salanay hunter apan maghatag unta kini og kadasig sa uban nga magpakabana sa kalikopan.