Wala pa gihapon kabangon

Sa tinuod lang daghan pa kaayo nga mga dapit ang wala pa gyud nakabangon sa katalagman nga nahiaguman ilabi na sa bagyong Tino.

Base usab kini sa akong nakita sa kanunay nakong pagsuroy suroy kada adlaw.

Niadtong Huebes sa niaging semana nibalik ko sa mountain baranggay Lusaran kay dunay gipahigayon nga proseso ang Disaster Victim Identification sa pamilya sa mga missing person sa pag igo sa bagyong Tino kay duna pa lagiy unom ang wala pa igkita sa Cebu City nga naglakip sa tag usa sa Lusaran, Paril ug Binaliw samtang adunay tulo sa Bacayan.

Gikuhaan ang pamilya og specimen alang sa DNA crossmatching.

Kapin sa buwan na ang nalalabay apan nagpabilin ang kasakit ug kalisang sa mga tawo. Nakita nako ang ilang pahiyom apan nagsubo ang ilang kasingkasing ilabi na kadtong mga grabeng naapektohan, kadtong nawad-an og mahal sa kinabuhi.

Dunay napalgan apan duna usay padayon nga gipangita ug dili mahatagan og closure ang ilang gibati hangtud makompirmar kong asa na sila nahimutang.

Gikan sa sa Lusaran, akong naagian ang ubang mga barangay sa bukid sama sa Paril, Cambinocot, Binaliw nga nakaangkon usab og grabeng kadaut diin sagad sa mga dapit nga adunay sapa nga nagsubay gipangbanlas man ang mga balay ug ubang kabtangan.

Kini ang nakita sa media ug sa social media nga nabisita usab sa mga opisyal sa kagamhanan apan kumusta man usab kaha ang ubang dapit nga dunay duol og sapa nga wala mapakita sa socmed?

Dunay nag ingon nako nga grabe pud ang nahitabo sa Baranggay Buot, Bonbon ug ubang mga dapit sa bukid. Kini atong gihisgotan sa dakbayan sa Sugbo pa lang, walay labot ang mga lungsod nga apektado sa lalawigan sa Sugbo, samot na seguro.

Dili lalim ang kasinatian nga bisan sa damgo lang kuno wala nila damha nga mahitabo.

Kadtong mga nakakuha og unit sa subdivision nga padayong gidatahan ang balay, dunay mga sakyanan nga gidatahan pa usab unsanon nalang sa pagbangon, kini ang akong nadunggan nila.

Gihagoan nila ang tanan nga makapundar aron makatilaw pud og medyo hayahay nga kinabuhi bisan inutang ang tanan apan sa usa ka pagpamilok naguba ang tanan.

Ang damgo sa mga tawo nga nahimong urom gumikan sa katalagman.

Mas swerte pa gani sila itandi sa mga nagpuyo lang sa yanong balay o payag nga wala gyuy napunit, gustohon man nilang mobangon apan walay kakuginitan maong padayon silang naghapa sa yuta sa kalisdanan.

Kadtong mga politiko nga kusog kaayo mag ulog-ulog sa mga tawo panahon sa kampanya sa eleksyon karon ang perfect time ninyo nga motabang sa kinasingkasing sa mga tawo nga mibutang kaninyo sa katungdanan ug dili lang pilion kay sa bagyo tanan gyud giharos ni Tino.

Unta sa pagsaulog sa pasko mabatyagan man lang ang diwa niini, makahinumdum nga ang pagkaluwas nato gikan sa katalagman ang literal nga pagluwas kanato sa atong Ginoo nga maoy sentro sa atong pagsaulog sa Pasko.