Bagis nga mga dispatcher

Gipalapdan pa sa syudad ang kampanya batok sa mga dispatchers nga mamiktima og mga pasahero diha sa pantalan.

Gipahibawo ni Mayor Nestor Archival nga hasta ang mga mapahimuslanon nga mamaligya og tiket sa barko sa mas mahal nga presyo ilang gukdon.

Nindot ang gihimo sa syudad tungtod kay daghan intawon sa mga dumodoong dinhi sa ato, labi karong panahon sa Pasko ug Sinulog, nga mabiktima sa mga bagis sa pantalan.

Tungod sa kahadlok ang uban mapugos intawon sa paghatag sa mga dispatcher nga mobulantaryo pagtawag og sakyanan bisan wala nimo sugoa.

Ang tinuod dili lang ni sa pier nahitabo kon dili apil na sa mga terminal sa bus.

Ilang atngan ang mga moabot gikan sa probinsiya ug bantayan kun mosakay og taxi o ba kaha PUJ unya modayon og pangayo og sinsiyo isip suhol sa ilang kunohay pagtawag og sakyanan.

Mas nahatagan lang og pagtagad ang pantalan tungod kay mas grabi ang problema diha sa maong dapit.

Apan naglibog ko nganong milipang ning maong illegal nga buhat sa pantalan nga unta naa man ni mahimutang sa nataran sa presento sa kapolisan.

Diha sa Pier 1 diin sagad mabiktima ang mga byahidor, maabot ra og lud-an ang Waterfront Police Station.

Apan bisan sa maong sitwasyon labihan ka kursonado sa mga dispatcher nga manglungi sa mga inosenting pasahero.

Tingali angayang badlongon sa kapolisan ang mga dispatcher nga naglihok diha sa pantalan labi pa atubangan mismo sa ilang buhatan kay dako kining sagpa nila nga mga awtoridad.

Gawas niini, angayan sab nga ilakip ni Mayor Archival sa kampanya ang mga nagsilbing parking attendant diha sa kadalanan.

Maisip gihapon kini nga dispatching ug dakong illegal. Sagad nilang mga biktima ang mga tag-iya og pribadong sakyanan nga mo parking sa mga pay parking zones sa syudad.

Madoble ang bayad sa mga tag-iya og sakyanan nga mo parking sa mga pay parking zone tungod kay gawas sa legal nga bayranan sa kontraktor sa syudad, kinahanglan pa sila nga mohatag sa mga dispatcher tungod kay kun dili ayaw na og balik kay siguradong mapuno sa gas-gas imong sakyanan.

Ug way swerte bato-on pa ang imong sakyanan.