Juan Magbubunyag

Maayong Balita

Matag Ikaduhang Domingo sa Adbiyento nahimong sentro nga personahe si Juan Magbubunyag.

Siya kadtong tingog sa kamingawan nga nag-awhag kanato nga atong andamon ang atong kaugalingong mga kasingkasing aron pagdawat sa atong Ginoo nga taliabot.

Kasinatian

Daghanan kanato ang nahimong nahimulag gikan sa Dios gumikan sa sala. Ang sala maoy nagputol sa atong kalambigitan sa Dios. Ang bunyag ni Juan alang man kanila nga naglunang sa sala ug nahilayo sa gingharian. Sa pagpabunyag ni Kristo Jesus nagpasabot ba kini nga siya makasasala usab? Ang tubag dili. Hinunoa, niambit siya sa atong tawhanong kaalaot aron kita makaambit sa iyang Diosnong kahimtang. Ingon niini kadako ang gugma sa Dios alang kanato nga tungod niini gipadala niya ang iyang bugtong anak aron si kinsa kadtong motuo kaniya dili gayud mamatay kondili makabaton hinuon sa kinabuhing dayon. (Jn. 3;16)

Lihok

Maayo ug makatarunganon nga sa dili pa matapos kining tuig 2025 moduol kita sa kumpisalan. Mangayo kita og pasaylo aron mamahimo kitang takus ug angayan nga mopadayon kaniya diha sa atong tagsatagsa ka mga kasingkasing.