EDITORYAL - Sakripisyo para sa nasud

Dul-an napulo ka tuig na ang nakalabay nabuthan og bomba ang sundalong si Captain Jerome Jacuba, sakop sa First Scout Ranger Regiment sa Philippine Army didto sa Datu Salibo sa Maguindanao atol sa usa nila ka operasyon batok sa mga teroristang Bangsamoro Islamic Freedom Fighter (BIFF). Ang kakusog sa bomba halos miwasak sa iyang nawong, napusa iyang wala nga kalimutaw ug tungod sa kakusog sa presyur sa pagbuto wala makasugakod ang iyang tuong mata. Nabuta siya.

Aduna siyay tulo ka mga anak nga mga babaye sa asawang usa ka magtutudlo. Dili na niya makita pa ang ilang pagtubo hangtud sa hangtud.

Apan human siya nakagawas sa tambalanan mipadayun siya sa panerbisyo isip usa ka sundalo, wala sa iyang bokabolaryo ang ‘quit.’

Naglimbasog siyang makabarug sa kaugalingong kusog ug panghunahuna gamit ang mga nakat-unan sa pagkasundalo ilabi na sa training sa Scout Ranger ug suporta sa iyang pamilya.

Gihimo niyang content sa social media ang inadlaw-adlaw niyang gipangbuhat aron paghatag og inspirasyon sa iyang mga kaubanang sundalo, ilang mga pamilya ug ingon man sa mga kabataang Pilipino.

Apan Nobiyembre 30,2025, lahi na ang unod sa iyang content. Human sa 15 ka tuig ug 45 ka adlaw niyang serbisyo sa nasud, gihatdan siya og papel nga nag-ingong tangtangon na siya sa hanay sa AFP tungod sa gitawag nga “Complete Disability” policy niini.

“Hindi po nawala ang aking paningin, ibinigay ko lang po sa ating bansa. Isang karangalan po ang mabulag para sa ating bayan….. I believe I did my part as a soldier, as your soldier, kahit ano pa po ang nangyari sa akin ay di ko pinasisihan, kahit akoy bibigyan muli ng pagkakataon na makapagserbisyo muli sa bayan pipiliin ko muli ang pagiging sundalo,” matud pang Jacuba.

Ang iyang “content” naabot sa Malacañang. Nagpa-video dayun si Presidente Ferdinand Marcos Jr.  ug namulong nga “Parang hindi tama” nga pagkahuman sa sakripisyong iyang gihatag  tangtangon si Jacuba sa serbisyo. Gimando niyang hunongon ang pag-discharge kang Jacuba ug i-promote kini ngadto sa pagka Major. Gimando sab niya ipa-review ang Complete Disability policy sa AFP aron dili na kini mahitabo pa sa mga nangaangol nga mga sundalo.