EDITORYAL — 252 ghost projects, asa ang budget?

Ang Armed Forces of the Philippines (AFP) mipahibalo nga 252 ka mga ghost projects ang ilang nadiskubrehan sa tibuok nasud sa ilang gihimong kaugalingong imbestigasyon pagtabang sa imbestigasyon nga gihimo sa Independent Commission for Infrastructure (ICI) sa anomalya sa flood control ug uban pang mga construction projects sa gobiyerno.

Ang AFP kabahin sa technical working group on asset recovery and case build-up sa ICI nga maoy nag-imbestigar sa tanang mga flood control ug infrastructure projects sa gobiyerno sulod sa nakalabay nga napulo ka tuig.

Ang tigpamaba sa AFP Col. Francel Margareth Padilla miingon nga si  AFP chief Gen. Romeo Brawner Jr. mitambong gyud sa ICI hearings isip kabahin sa nag-imbestigar sa anomalya , aron ipakita ngadto sa publiko kun unsa ka seryuso ang AFP nga makab-ot ang hustisya sa tanan sa mas dali nga panahon.

Ang AFP lakip na ang PNP naghimo na og imbestigasyon sa gibanabanang 30,000 ka mga proyekto sa gobiyerno apan 10,000 palang niini ang ilang nahuman og inspeksyon.

Apan matud pang Padilla,  duna na silay nasakpang 252 ka mga ghost projects o mga proyektong sa papel nahuman na ug nakuha na ang pundo, apan walay bisan usa ka haligi walay nakit-an sa lugar diin kini gitukod. Asa man napadulong ang budget ani?

Ang giinspeksyon sa AFP ug sa PNP mao ang mga proyektong gitukod sugod tuig 2016—panahon ni kanhi presidente Rodrigo Duterte kansang administrasyon misaad nga tutokan ang “build-build-build” program aron mapalambo ang nasud.

Kaning mga ghost projects nasakpan kini gikan sa nagkalain-laing mga lugar sa nasud, padayun pa sila sa pagsubay sa nahibiling 20,000 pa ka mga infrastructure projects ug flood control projects ug panigurado nga duna pay laing mga ghost projects ug mga substandard projects nga masakpan.

Ingon niana ka-garapal kun mangawat ang mga naa sa posisyon sa gobiyerno. Pila ka bilyones ka pesos ang napadung sa ilang mga bulsa lakip na sa ilang mga kakunsabong mga contractors ug mga proponents o mga magbabalaod nga maoy nangayo sa maong pundo.

Kinahanglan gyud mailhan ug mapasakaan og kaso ug mabawi ang gipangkawat nga pundo. Apan dili kini mahitabo kun dili suportahan sa katawhan ang imbestigasyon.