EDITORYAL - Pagpananom og kahoy

Usa ka maayong ordinansahon ang giduso sa SK Federation Chairman sa Mandaue City nga himuong requirement sa mga mogradwar sa senior high school ug kolehiyo sa publiko ug pribadong mga tunghaan sa dakbayan ang pagtanom og kahoy.

Si Mandaue City  Sangguniang Kabataan Federation President Fleurits Gyle Jumao-as niduso og ordinansahon sa Konseho para sa maong katuyoan.

Ang Banat News makadaghan ng nag-awhag sa mga opisyales sa lokal nga pangamhaman sa nagkadaiyang LGUs kaniadto pa nga dako kaayo og matabang ang kabataan sa pagpabalik sa katahom sa kabukiran pinaagi sa pagtanom og mga kahoy sa mga mogradwar sa mga eskuylahan kada tuig.

Sa ordinansahon ni Jumao-as, ang matag mogradwar nga estudyante patamnon og duha ka semilya sa punoan sa kahoy sa mga bakanteng luna sa siyudad, kilid sa kasapaan ug mga public parks.

Dunay buhatan nga tukoron para maoy momentinar ug moamuma sa mga semilya aron sigurado kining motubo ug modako. Kung pananglitan dunay usa ka libong tinun-an sa senior high school ug kolehiyo nga mogradwar, makatanom sila og duha ka libo ka punoan sa kahoy kada tuig.  Sulod sa lima ka tuig mahimo ng 10,000 ka punoan sa kahoy ang natanom ug ang unang us aka libo niini tingali nagsugod na og pamuwak ug pamunga.

Maayo kaayo kini nga lakang ug makatabang dili lang pagpatahom sa siyudad sa Mandaue kondili pagpalimpyo sab sa hanging hanggabon sa mga tawo.

Gawas pa niana, makatabang sab kini pagpugong nga dili modahili ang mga yuta sa mga kilid sa sapa ug kabukiran, makapuno sab kini sa pundo sa tubig sa ilawom sa yuta para mobalik ang kalawom sa mga tubig sa kasapaan sa siyudad.

Tinuod dili gyud dayun makita ang benepisyo gikan ani, apan dili nalang kwentahon ang karon, ang mga kahoy para kini sa umaabot nga kabataang henerasyon nga mosunod kanato. Maayo unta og himuon sab kini sa ubang mga SK Federations sa tanang mga LGUs aron mabalik ang kalabong sa mga kalasangan sa kabukiran, limpyong hangin, limpyong mga sapa ug menus nga mga pagbaha ug pagdahil sa yuta.