Mga Bayani nga gikulban og kaldero

Imbis pasidunggan tungod sa bayanihong buhat nga nahimo ngadto sa isi'g ka tawo, gikulban naman hinuon sa kaldero. Kini ang gidangagatan sa driver sa wing van nga si Francis Anthony Narvasa uban ang duha ka pahinante nga niluwas sa mga tawo nga naanod sa baha didto sa Cotcot, Liloan, Cebu niadtong Nobiembre 4 sa pag-igo sa bagyong Tino. Tungod lang kay gigamit nila ang sakyanan isip instrumento sa pagluwas sa kinabuhi sa mga tawo.

Pagkawalay puangod sa tag-iya sa wing van nga wala makakita sa panginahanglan sa mga tawo niadtong tungora ug salamat kay ang iyang mga tawo dunay kasingkasing nga mibati sa mga nagkinahanglan.

Apan ang tag-iya dunay kasingkasing pero bato nga wala gyud maluoy sa iyang mga empleyado nga gitangtang dayon sa trabaho.

Ang nahitabo sa mga trabahante ang nagpakita sa duha ka matang sa tawo nga hakog diin ang kaugalingon lang ang gitan-aw ug ang tawo nga gitan-aw ang kaayohan ug kaluwasan sa uban o mas gitawag sa ininglis nga selfless.

Ang kaagi sa mga trabahante nakaabot sa social media ug daghan ang natandog. Naay mga mibati og tumang kaluoy nga gusto sila hatagan og trabaho diha diha dayon.

Mismo si Governor Pamela Baricuatro ang nakig-estorya kang Francis personal sa Capitol ug didto gihatagan dayon og trabaho o hired on the spot siya.

Tinuod ang giingon nga kong dunay bintana nga manira duna usay pultahan nga moabli. Ug mao kini ang nahitabo sa trabahante, dako nga pultahan sa oportunidad ang nibukas alang kaniya.

Gikatakda usab silang pasidunggan sa Police Regional Office-7 isip mga bayani tungod kay wala nila hunahunaa ang mahitabo kanila kong gamiton ang sakyanan nga dili ilaha. Tinuod silang mga bayani nga angayan lang ilhon.

Apan unsa man ang angayang himoon sa kompaniya nga mipapha kanila?

Kini mao ang atong ipaabot ngadto sa DOLE kay sa akong nasayran dili mamahimong makapapahawa ang agalon sa iyang trabahante panahon nga adunay katalagman. Kong duna man silay nalapas sa kontrata nga ilang gipirmahan unta gihatagan sila og igo nga panahon pinasubay sa balaod o hatagan sila og due process.

Dili lang ang pag-ila kanila isip mga bayani ang angayan nilang makuha kon dili ang hustisya alang sa ilang gidangatan. Dili maayo nga palabyon kining gihimo sa ilang employer. Angayan silang patagmon gamit ang balaod hangtud mahigmata sa dautan nilang kinaiya.

Giila nga bayani mismo sa PNP ug sa Office of the Governor ug mismo sa mga tawo ang driver ug mga pahinante. Apan gidaugdaug na hinoon sila sa ilang kompaniya busa gikinahanglan nga maangkon nila ang hustisya gikan sa nagkulob sa ilang kaldero.