Gasa ni Max
Namatay na lang si Max Limpag wala g’yud mi magkita. Giisnab nakong iyang mga imbitasyon og kape uban sa mga sakop sa media nga pagtuki sa mga teknolohiya sa mas sayon nga pagtipig ug pag-analisar dagkong bulto sa mga dokumento, sama sa tinuig nga reports sa Commission on Audit (COA).
Niingon siyang mahimo ming magkita sa University of the Philippines (UP) kon makatambong sa kalihokan nga iyang giapilan. Dihang sa kataposan nakalugar ko pagbisita sa UP naatol nga duna siyay laing giatiman.
* * *
Nagsugod mi og chat dihang gikomentaryohan nakong iyang mga sinuwat sa mga eskandalo sa simbahan ug hilas-hilas sa media. Niapil ko og kasuko dihang gi-ban siya sa Archbishop’s Palace. Nitabang og abiba pag-uli sa gikawat nga pulpit panels sa simbahan sa Boljoon (daghang nangilog sa kredito pero siyay tinuod nga nagsugod, nangulo ug nitiwas sa kawsa).
Nisalig na tingali kay gipabasa ko sa iyang mga artikulo sa wala pa mogawas sa Rappler ug ubang mga publikasyon. Nirekomendar og mga anggulo nga akong nalaktawan. Dihang nakabantay nga naglibog ug naluya sa bag-ong plataporma giawhag ko niya sa dili paghunong.
* * *
Dihang nabulilyaso ang una namong interview kalma siyang nisugot og take 2. Bisan nalangay’ng iyang panihapon matinabangong gitubag ang akong mga pangutana (ang mga walay kapuslanan iyang gigiyahan ug gihimong mapuslanon).
Iyang comments sa akong livestreams nagpakita nga interesado sa mga isyung wala maapil sa iyang naandang coverage. Siyay unang nitawag sa Lapu-Lapu City nga epal capital of the Philippines (hinaut nga mas malinawon ang pagtaliwan sa kasayuran nga gimenosan na sa mga Chan ang pagbandera sa ilang nawong).
* * *
Dihang nangutana ko sa viewers unsay kinalamiang siopao, gi-nominate niyang Sacred Heart Center (mas lami kuno uban sa ilang lomi). Dihang nanghambog nga nakadiskubre sa kinalamian ug kinabaratohang palabok, iya kong gi-chat nga maoy ilang gipaniudto ni Marlen.
Kataposan niyang chat nipahinumdom nga hapit na mogawas ang COA reports, nisaad pagsusi unsay labok sa Sugboanong local government units ug niingon nga magpatabang sa viewers pagsubay sa mga transaksiyon sa mga politiko. Sa kadaghan sa mga kamatuoran nga nasangyaw ug mga kinabuhi nga nahikap, mapasalamaton kong nakaambit sa iyang kamanggihatagon, katakos, kaligdong ug kabantogan.
* * *
- Latest
