Viva Cristo Rey!

Maayong Balita

Grabe ang kagahob sa mga tawo. Daghan ang nisinggit apan ang maong singgit dili singgit sa abiba kondili singgit sa kapintas ug pangindahay nga ang giilang hari kinahanglang mamatay gayud! Bisan gani ang kauban niya nga gilansang sa krus ang nagbugal bugal man pud kaniya bisan pa man kun anaa na sila sa kalisud ug sa kamatayon. Apan ang maong kauban niya sa tuong bahin ang nibadlong man kaniya tungod kay siya mismo ang nasayud kun unsa sila ug kinsa kining kauban nila nga gilansang. Mahangyoon siya nga kun mahimo uban siya sa Paraiso ug diha sa mga mata sa pagtuo sayud kita nga ang maong kawatan nahiuban gyud kang Kristong Hari sa iyang gingharian niadto gyung adlawa!

Kasinatian

Ang atong pagsabot sa hari mao kadtong gamhanan og tingog. Mabali ang tanan dili ang tingog sa hari. Kontrolado niya ang tanan ug anaa na kaniya halos ang tanan. Apan lahi ang atong Nakita nga hari karong dominggoha. Ang maong hari puno sa bugalbugal ug pagtamay. Puno sa mga panghimaraot ug kahuyangan? Mao ba kini ang hari? Lahi ang pagkahari sa atong Ginoong Jesus nianhi siya aron moalagad ug dili aron alagaran! Mianhi siya aron mahigugma ug dili aron magpakita sa gahom diha sa pagpanlupig!

Ang atong local nga Simbahan nihimo karon og pagmartasa batok sa korupsiyon. Ang kasaulogan sa pangilin ni Kristong Hari pahinumdom kanila nga anaa sa gahom nga ang ilang nahuptan nga posisyon dili prebilihiyo kondili kaakuhan ug responsbilidad.

Pangamuyo

Christus Vincit! Christus Regnat! Christus! Christus Imperat! Viva Christo Rey!