Tinun-an gikulata sud sa eskuylahan

CEBU, Philippines — Lima ka mga tawo ang giingong ilegal nga nisulod sa University of San Jose-Recoletos (USJ-R) Basak Campus sa dakbayan sa Sugbo ug gikulata ang usa ka lalaking tinun-an sa sulod sa iyang classroom niadtong Martes, Nobyembre 18.

Kini base sa nakuhang impormasyon sa Banat News gikan sa Cebu City Police Office - Inayawan Police Station 7 gahapon, Nobyembre 20.

Matud sa kapulisan na personal nga nagpa blotter ang gwardiya sa maong campus nga si Crice Eire Oliver, 42, isip representante sa USJ-R Management niadtong Nobyembre 19.

Gisaysay ni Oliver nga pasado alas 3:40 sa hapon niadtong Martes, nisulod sa tunghaan ang usa ka pick-up truck nga dunay sakay nga lima ka tawo.

Ang maong panghitabo nakuhaan sa CCTV cameras sa unibersidad. Nakita didto nga nisulod ang maong mga lalaki sa usa ka classroom ug gitabangan og kulata ang naglingkod nga usa ka lalaking naka-civilian attire o shorts nga usa diay ka estudyante sulod sa classroom.

Ang wala mailhing biktima gisumbag sa makadaghang higayon sa sa wala pud mailhing lalaki, dunay mga tawo sa lawak nga ni-uwang sa maong mga lalaki.

Human sa insidente, giingong daling misibat ang lima ug nisakay sa ilang sakyanan ug didto migawas sa back gate paingon sa usa ka subdivision sa Barangay Quiot Pardo. Giila usab ni Oliver ang duha sa lima ka mga tawong nalambigit sa maong krimen. Ang usa niini giila nga si alyas "Gab" 21, samtang ang usa mao ang iyang 14-anyos nga manghod sa usa ka kanhi estudyante sa maong unibersidad.

Matud sa kapolisan sa Inayawan Police Station 7 nga gawas sa blotter report, nagpaabot pa sila nga makadawat og pormal nga reklamo gikan sa unibersidad ug sa estudyanteng biktima aron makahimo sila og follow-up nga imbestigasyon batok sa mga sad-an.

Kagahapon, nipagawas na og opisyal nga pamahayag ang USJ-R kalabot sa insidente nga giingong gi-isolate ug gi-report na kini sa kapolisan.

Gibutyag usab sa unibersidad nga giandam na nila ang kinahanglan nga mga dokumento ug ebidensya alang sa pagsang-at sa mga kasong kriminal batok sa mga nalambigit nga indibidwal.

Dugang pa, ang USJ-R miingon nga human sa insidente, nagpatuman dayon sila og mga debriefing measures ug hugot nga nag-monitor sa kahimtang sa mga estudyante nga nalambigit o apektado. Ang tunghaan nakigalayon usab sa mga ginikanan ug mga guardians aron sa pagsiguro kanila nga ang kampus nagpabilin nga luwas nga lugar alang sa pag-eskwela.

Naghimo usab og imbestigasyon ang administrasyon aron mapalig-on ang ilang mga lakang sa kaluwasan ug aron masiguro ang tulubagon sa bisan unsang mga paglapas sa ilang mga palisiya sa eskuylahan.

“... the administration is conducting a thorough internal investigation and review to strengthen campus safety measures and ensure accountability for any breach of law, policy, or school regulations,” matud sa pahayag.

“The University reiterates its unwavering commitment to maintaining USJ-R Basak Campus as a safe, secure, and nurturing environment for education and formation,” dugang niini. IBM BANAT NEWS