EDITORYAL - Hain ang TUPAD?

Magtulo ka semana na sukad nga naigo sa bagyong Tino ang Sugbu daghan pa gihapong mga basura, mga lapok nga wala gihapon makuha gikan sa mga kana ug sa mga kilid sa mga kadalanan nga nakahasol sa mga motorista ug abog sa palibot.

Ang bagyong Tino nikalas og daghang kinabuhi, gawas  nga nagdala og grabeng kadaut nagbilin sab og daghang mga basura ug lapok sa nagkadaiyang mga barangay ug kadalanan nga hangtud karon wala pa gyud hingpit nahipos o nahabwa gikan sa mga kanal.

Nganong pwerte mang hinaya sa paghipos niini? Hain naman diay ang mga cash for work programs sa gobiyerno sama sa TUPAD o Tulong Panghanapbuhay sa Ating Disadvantaged/Displaced Workers.

Kaning programaha inisyatiba kini sa gobiyerno aron makahatag og dinaliang trabaho sa mga mamumuo gikan sa informal sector nga walay permanenteng trabaho o kadtong natangtang sa trabaho.

Dako unta sila og gamit karong mga panahona nga daghang nagkatag nga mga basura ug lapok, apan hain kaha sila karon?

Ang maong programa dili lang nakahatag og panginabuhian sa uban o nakapuno sa kita sa usa ka pamilya, kondili makatabang unta sa paspas nga recovery sa mga naapektahang mga lugar.

Karon unta ang panahon nga gamit kaayo sila kun gimobilisar dayun ug labaw sa tanan mapakita nila sa publiko nga dili pag-usik-usik sa pundo sa gobiyerno ang maong programa.

Samtang tinuod gyud nga nagtinarong ang mga benepisaryo sa tahas nga gihatag kanila bugti sa dugang kita bisan og tempo-tempo ra silang manglimpyo sa kadalanan.

Apan sa nangaging mga buwan, dunay mga nanggawas nga mga videos sa social media nga namasangil sa pipila ka mga benepisaryo sa maong programa nga “gi-drama” ra ang ilang pagpanglimpyo ug wala gyud silay dakong kontribusyon sa katilingban.

Tinuod man o dili kining mga videos, pwede kining papason sa hunahuna sa mga tawo kung makita gyud nga gihagoan sa mga benepisaryo ang gisuhol kanila.