Pinatuyangang kawat
Karaang maniobra sa pork barrel (niadto itom ug baga pa ang among buhok):
Kongresista manglista sa mga proyekto nga gikinahanglan sa iyang distrito (apil ang classrooms, barangay halls, skywalks, multipurpose buildings ug uban pa);
Magpalaban sa kadagkoan sa House of Representatives aron mapundohan ang iyang lista;
Makigsabot sa iyang paboritong mga kontraktor aron matakda nang daan pilay iyang bahin inig patuman sa mga proyekto; ug
Makigsabot sa kadagkoan sa Department of Public Works and Highways (DPWH) ug ubang implementing agencies pagseguro nga iyang paboritong mga kontraktor maoy makadaog sa subasta.
* * *
Tungod sa mas dakong budget sa DPWH ug pagsulbong sa flood control projects, nabali ang proseso:
Mga inhinyero sa DPWH ang nilista sa mga proyekto (dili pinasikad sa panginahanglan kon dili sa kasayon nga panguwartahan);
Mga kontraktor nagpinuhalay sa ilang komisyon para sa mga politiko uban ang pasalig nga ihatag daan ang pasiunang komisyon sa dili pa mapatuman ang mga proyekto (maong niburot ang komisyon ngadto sa 25-30%); ug
Mga politiko mobungat na lang pilay ilang gikinahanglan ug DPWH ug mga kontraktor nay moapil sa mga proyekto nga silay proponents.
* * *
Kay wala man gyoy busganan ang mga kawatan, naghimo sila og “Leadership Fund” ginamit ang katunga sa tinuig nga budget sa DPWH ug gihimong “allocables” aron dunay andam nang daan nga pundo para sa bisan unsang mga proyekto nga ilang mahunahunaan:
Magkataas ang ranggo ug magkasikit sa administrasyon sa mga kongresista ug mga senador magkadako sab ang allocables;
Bisan mga sakop sa gabinete nga nakat-on sa raket duna nay allocables; ug
Mga opisyal sa DPWH mopabilin og bahin sa “Leadership Fund” isip ilang kaugalingong “allocables.”
* * *
Kay wala may kinutoban ang kinawatay, ang mga nabuhong sa raket nipadako sa ilang surikbot ug bisan ang mga walay labot nangayo og bahin:
Ubang mga trabahante sa DPWH nipataas sa bayranan sa mga dokumento nga gikinahanglan pagpatuman sa mga proyekto;
Mga opisyal sa barangay, lungsod ug siyudad nipataas sa presyo sa ilang pirma nga gikinahanglan sa pagsugod sa mga proyekto; ug
Mga sakop sa gabinete nigamit sa ngalan sa ilang mga labaw, apil nang presidente, pagkumbinser sa mga kongresista ug taga DPWH paghatag og mas dakong “commitment.”
* * *
- Latest
