Hikalimti ayaw

Adunay usa ka African Proverb nga nagkanayon: “Ayaw kalimti ang karaan nimong sapatos nga imong gigamit paglakaw sa imong pagpalit og bag-o.”

Nagpahinumdom kini kanatong mga tawo nga dili maayong makalimot sa mga tawo, panghitabo o mga butang nga nakatabang kanato panahon sa atong kalisud ug mga pagsulay.

Sila kadtong niunong kanato ug nakatampo sa kun bisan unsa nga atong nakab-ot karon. Sila kadtong nisapnay kanato sa mga higayon nga kita nalumsan sa mga kapakyasan ug mga kalisdanan.

Sila kadtong mga higala nga nisayaw sa atong sonata panahon sa mga unos sa atong kinabuhi.

Ang mga dili tinuod nga mga higala mopakita lamang sa mga nindot nga panahon apan dilis a higayon sa kapakyasan ug kasub-anan.

Apan dunay mga higayon nga ang usa ka tawo nahikalimot sa iyang kagikan. Tungod tingali ning mosunod nga mga rason:

1. Ang kagahapon alang kaniya lisud ug pit-os. Ang paghinumdom sa ingon usa naman ka impiyerno. Ang paghikalimot sa ingon alang kaniya kasinatian sa kalingkawasan.

2.    Ang kagahapon kasinatian sa kapakyasan. Ang pagpadayon sa unahan kasinatian sa kadaugan.

3.    Ang kagahapon usa man ka silot ang pagpadayon sa unahan usa ka panalangin.

Apan dunay panultihon nga kun dili kita molingi sa atong gigikanan dili kita makapadayon sa atong padulngan. Sa laing bahin, atong hinumdoman nga ang kagahapon dili man usa ka life sentence kondili lesson to be learned.

Ang bisan unsa nga panalangin nga atong nadawat gikan ni bisan kinsa nga nagbuhat kanato og kaayohan ato pud untang ipaambit ngadto sa uban.

Ang karaang sapatos nagpanahinumdom kanato sa dakong bili sa pagpasalamat ug pagpaambit.