Long term lease sa yuta

Dear Atty. Divine,

 Aduna koy pangutana labot sa akong property nga gustong abangan ug tukuran og opisina sa usa ka langyaw. Ang iyang asawa maoy nakig-negotiate nako ug mihangyo nga ilang abangan sud sa 20 ka tuig ang akong property. Naglibog ko kun ako ba kining paabangan o dili. Unsay may imong ikatambag kalabot niini? Daghang salamat. —Gwen

Dear Gwen,

 Kinahanglan imong huna-hunaon pag-ayo sa dili pa ka modesisyon kon paabangan ba nimo o dili ang imong property. Kini tungod kay kon mosulod ka og long term lease contract sud sa 20 ka tuig hayan dili ka makagamit sa imong property ug dili sab kini basta-basta nimong mabawi kun wa pa matapos ang lease contract. Dili sab kini nimo daling mabaligya gawas lang kun mosugot ang buyer nga iyang ipadayon ang pagpa-abang hangtud nga matapos ang termino sa lease contract. Usa na sa mga punto nga imong huna-hunaon pag-ayo. Hinuon kun aduna pa kay laing property gawas anang imong paabangan nga yuta then dili ra problema kon mosud ka og long term nga lease contract kay kon magkinahanglan ka, aduna pa man ikaw laing property nga mamahimong mabaligya. Imo lang gyud paabangan sa reasonable nga monthly rent ang imong yuta aron di sab ka magmahay. Thank you and God bless. Atty. Divine

 Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo