Mangtas nga Monterrazas

Nahugno ko pagkakita sa mga letrato sa The Freeman sa lapad nga pag-upaw ug bangis nga pagkagis sa mga bukid nga gitukoran sa Monterrazas de Cebu sa ilang subdivision ug condominium units. Bakak diay ang ilang pasalig nga ang proyekto dili moguba kon dili mopalambo sa kinaiyahan.

Kinsay makaako pagluba sa kabukiran nga saksi sa paglambo sa kasaysayan sa Sugbo aron lang pagpaburot sa ilang bolsa? Developers nga niinsistir nga mga sagbot ang kapin sa 700 ka mga punoan sa kahoy nga ilang gipamutol.

* * *

Tugoting pahuwaman kining luna sa masuk-anong mga reaksiyon sa viewers sa among programang “Baruganan” sa YouTube:

Retention ponds sa Monterrazas wala kapugong sa napusgay nilang pagarpar nga luwas ang Guadalupe ug silingang mga barangay;

Gihuboan ang kabukiran, gibahaan ang katawhan–ilang ginansiya, atong disgrasya;

Bagyong Tino nibisto sa higanteng ilad: Pagsemento sa kabukiran dili makatabon sa krimen sa kalikopan;

* * *

Ilang sales talk luwas nga mga pinuy-anan, ilang gitukod mga istruktura sa katalagman;

Namaligya sila og saad sa view sa Sugbo ug kasilinganang mga isla, ang ilang gihimo mga hudlat sa kinabuhi ug kabtangan;

Hambog ni Slater Young nabanlas sa baha ug dahili sa yuta;

Bagyo nipakita sa ilang binuang, kabukiran sa mga Sugbuanon dili angayg duwaan;

Peke ang ilang garantiya, tinuod ang mas dagkong hulga sa kadaot;

Gisakripisyo ang kabukiran para sa negosyo, mga Sugbuanon maoy gipabayad sa ilang kahakog;

* * *

Kabukiran dili malimot sa pagpanamastamas, segurong maningil og hustisya sa ilang ka-mangtas;

Nindot ang mga plano nga ilang gi-drowing sa papel, implementasyon maoy bikil;

Mga dahon ug mga gamot sa kakahoyan dili gyod diay mapulihan sa taphaw nga garantiya nga mas kamao sila kay sa kinaiyahan;

Kaluwas sa mga Sugbuanon maoy palabihon kay sa pagpaburot sa ginansiya sa iresponsableng delopers;

Ayaw bugalbugali ang among yuta, dili baligya ang ugma sa among mga bata;

Hain man ang giwara-wara nga kaluwas, ang dili kamaong molangoy peligro nga matiwas;

Nipasalig sila og palasyo sa bukid, mga Sugbuanon maoy nitakilid; ug

Sa kada kahoy nga ilang giputol, henerasyon sa mga Sugbuanon ang naangol.

* * *

 [email protected]