Ni Ayaw kamo kahadlok

Maayong Balita

Ang atong Ginoo nagpasalig nga dili angayang mahadlok ang iyang mga sumusunod bisan pa man sa mga nagkadaiyang mga panglutos ug panglupig tungod ug alang kaniya. Naglakip kini sa mga pangbudhi bisan gani sa mga sakop sa pamilya sa kapasikaran nga sila tinun-an siya ni Jesus. Ang mahinungdanong magpabiling magmalig-on aron dili matarog bisan pa man sa mga katalagman ug mga pagpanglutos.

Kasinatian

Dili ikalimod nga sunod sunod ang mga katalagman nga nahitabo sa atong kinabuhi karon isip katawhan ug nasud. Ang mga linog, baha ug bagyo. Wala pay labot sa mga politikanhong kagubot nga nahitabo sa atong nasud ug sa tibuok kalibutan. Timailhan na ba kini sa Parousia kun sa ikaduhang pag-anhi sa atong Ginoo? Kini tungod kay ang tanang mga hitabo mag-agad man sa Dios nga gamhanan. Siya lamang ang nasayud sa tanan. Ug bisan pa man kun dili kita at home sa uncertainty sa tanang mga hitabo sa atong kinabuhi apan padayong pasibawon sa gihapon sulod sa atong hunahuna ug galamhan kining maong pasalig nga dili kita mahadlok.

Lihok

Ning panahona ang bugtong mahimo nato mao man ang pagpangandam sa paagi nga praktikal ug espiritwal kun magkinaunsa man gani. Dili angayang mabalaka o matarantar. Hinumdomi kun kita matarantar dili kita makahimo og maayong pagpaminsar.

Pangamuyo

Tanan: Dios namong Amahan giyahi kami sa kanunay aron magpabilin kaming lig-on taliwala sa mga pagsulay. Ang tanan mahimo kun anaa ang pagtuo.

Pagtuo nga bisan kun Ikaw O Dios hilom diha sa among mga kalisud ug mga kabalaka, ikaw uban kanamo sa mga malisud nga mga higayon.  Pinaagi ni Kristo among Ginoo. Amen.