Padre Cocoi

Tuig 2006 human sa ordinasyon nadestino ko sa Tapilon Daanbantayan. Gibutang ko ni Padre Rossdel Noel didto sa Isla sa Carnaza. 

Ang Parokya ni Sta. Rosa de Lima mao ang Parokya ni Padre Decoroso “Cocoi” Olmilla isip padre kura. Sukad kaniadto nahimo nako siyang higala bisan panagsa lang kami magkita.

Nahimo siya namong Episcopal Vicar samtang ako nadestino sa Mohon, Sogod kaniadto. Siya ang nag-instalar Kanako isip padre kura sa Parokya ni San Jose Mamumuo Madridejos, Alegria.

Panagsa lamang kami magkita tungod sa managlahing assignments. Panahon sa mga gatherings ug mga recollections kun makahigayon motimbaya.

Apan ning ulahi nga hitabo daw natuk-an ako samtang nagkaon.

Akong nabalitaan nga namatay si Padre Cocoi. Mas maayo nga iproseso sa hilom ang iyang gidangatan uban ang panghinaut nga molutaw ang kamatuoran.

Hamubo ra gyud ang kinabuhi natong mga tawo. Ang kamatayon walay pilion ingon man sa pangedaron nga kita mamatay.

Ang uban namatay nga malinawon samtang ang uban namatay sa paagi nga pintas ug kalit. Dunay uban gumikan sa sakit.

Apan managsama lamang ang tanan bisan nagkadaiya ang dagway. Kamatayon gihapon.

Salamat Padre sa mga higayon nga naminaw ka sa mga sugyot ug panahom gikan sa manghod nimong pari.

Salamat sa pagpakabana sa mga ginagmay nga mga suliran diha sa kinabuhing parianon.

Salamat niadtong adlaw nga niharong ka sa pagdumili sa usa ka pari nga maminaw ug gidawat mo gihapon ang sakit nga mga pulong gikan kaniya.

Ang mahinungdanon matud mo nga nipadayag ka sa imong tinguha nga katabangan siya.

Untimely man tuod ang imong kamatayon apan sayud ko nga ang Dios nagbakho uban kanamo. Sa mga misa ikaw among hinumdoman.

Padayon ug ayo ayo sa imong panaw padulong sa atong Langitnong Amahan, gikan kanamong imong mga igsuong kaparian! In Pace Requiescat!