We Remember, We Celebrate, We Believe'

Tipik kini sa awit nga We Remember. Ning panahon sa mga katalagman (Linog, Baha ug Bagyo!) Ato kining hinayhinayan og hagpat.

We Remember

Sa hataas nga panahon daghang mga katalagman ang nahiabot sa atong kinabuhi isip katilingban, matuohon ug isip usa ka nasud. Kadtong mga hitaboa ug mga katalagman nagpahinumdom kanatong tanan nga kita vulnerable ra gyud kaayo sa bisan unsang hitabo. Dili lang kay kita kondili lakip na sab ang atong planeta.

We Celebrate

Bisan pa man sa dakong katalagman angayan gihapon kitang magpasalamat. Pasalamat nga buhi pa gihapon kita karon. Pasalamat nga bisan pa man sa dakong kadaut nia kita gihatagan og kahigayonan nga manlimbasog. Wala kini magpasabot nga ang mga nakalas gidemalas ug kita giswerte.

Hinunoa uban niadtong mga tawo nga nakalas kita magbangotan apan human niana magsaulog nga gihatagan kita og igong higayon nga mobangon aron atong tul-iron ang bisan unsang kahiwian ug mga malpractices natong mga tawo. Dili lang kini mahitungod sa survival gikan sa katalagman. Mahitungod usab kini sa hustong mindset ug disposition sa pagpangandam ug pag-atubang sa matag katalagman.

Diha sa mga panahon sa kaabunda panahon kana sa pagtigom ug pagmontar. Pag-ayo ug pagpalig-on sa mga imprasktraktura nga makapanalipod nato panahon sa baha. Kay pagsaulog wala man magkahulogan og pag-usik-usik hinunoa pagtigom ug paggamit sa hustong paagi sa matag panalangin nga nadawat.

We Believe

Nga kita makabangon gikan ning maong kahunlakan. Nga kita makabarog gikan ning pagkawalay pangandam ug kumpiyansa sa gahom sa kinaiyahan. Unta magkat-on na kita niini ug mahigmata ning maong mga panghitabo sa atong kinabuhi isip katawhan ug isip matuohon.

 Tinuod ni survive ang kadaghanan ug napukan ang pipila. Apan anugon lamang ang tanang mga ayuda kun pabilin kitang dili magkat-on ug magbag-o sa atong panlantaw, pamaagi ug baruganan kun maghisgot na og katalagman. Dili kini silot sa Dios alang kanato.

Kay mosugot kita ug sa dili kita usab may natampo ning maong mga hitabo kay kun giampingan ug gihinloan ang atong panimalay nga mao ang kalibutan unta, ang matag tubig moagi gyud unta sa mas hapsay nga agianan.