Pagtalikod sa responsibilidad

Usa ka abogado ang misang-at og mga kasong kriminal ug administratiba batok nilang Kongresista Duke Frasco ug sa pito ka mga mayor sa kinto distrito nga mibiyahe paingon sa Uropa dihang miigo ang bagyong Tino dinhi sa Sugbo.

Si Atty. Julito Añora, Jr. miawhag sa Office of the Ombudsman nga ipaubos sa preventive suspension silang Frasco ug ang pito ka mga mayor nga sila si Liloan Mayor Aljew Frasco, Catmon Mayor Avis Monleon, San Francisco Mayor Alfredo Arquillano Jr., Tudela Mayor Greman Solante, Poro Mayor Edgar Rama, Pilar Mayor Manuel Santiago, ug Compostela Mayor Felijur Quiño.

Giawhag sab ni Añora ang Ombudsman nga tangtangon sa serbisyo ug did-an nga makahupot og pwesto sa gobyerno bisan kanus-a ang nahisgotang mga opisyal. Matud sa kihante nga daghan og kalapasan nga nahimo ang naasoy’ng mga opisyal lakip na niini ang gross neglect of duty, grave misconduct ug conduct prejudicial to the best interest of the service dihang ilang giabandonar ang ilang mga lungsod bisan nahibawo na silang daan nga dunay bagyo nga umaabot. Gihimug-atan ni Añora nga ubos sa balaod ang mga mayor maoy gitahasan isip kumander sa tanang disaster response sa ilang dapit. Apan tungod kay nipadayon sila sa ilang bakasyon didto sa London bisan sila nasayod nga dunay bagyong moabot naapektohan ang pagrespondi sa kagamhanan hinungdan nga daghan ang mga kinabuhi nga nakalas---labi na gyud sa Liloan nga maoy dunay labing daghan nga nakalas.

Kadudahan man ang motibo ni Añora sa iyang pagpasaka og kaso labi pa nga siya sab maoy nisang-at niadto og petition for disqualification batok ni kanhi gobernador Gwen Garcia, ang ugangan ni Kongresista Frasco, apan duna siyay punto batok sa pito ka mga mayor.

Dakong salawayon ug maisip nga pagtalikod sa ilang responsibilidad ngadto sa ilang mga constituents ang gihimo sa mga mayor. Nagpasuwabi nila ang kiat nga molangyaw sa way paghuna-huna sa katawhan nga nisalig nila. Ang ilang gihimo nagpakita nga dili sila takos ug angayan sa katungdanan nga gisangon sa publiko kanila.

Angayan silang mauwaw sa batan-ong mayor sa Borbon nga si Nico Dotillos tungod kay bisan sa iyang ka bag-o pa sa katungdanan mas nakahuna-huna pa kay sa mga nanggungis na sa politika nga dili modayon paglarga aron maatiman ang iyang mga constituents. Lalisonon hinoon alang nako nganong gilakip ni Añora si Kongresista Frasco sa kaso. Kun way pamolitika nga nagpahipi sa gihimo ni Añora angayang wala na niya ilakip ang kongresista tungod kay lahi ang iyang trabaho. Gawas pa opisyal ang iyang byahe sa London uban sa iyang asawa aron pag-promote sa turismo sa nasud isip kabahin sa iyang oversight function.