Gidayan-dayanan ang dalan

Tungod sa nasinati sa nasud nga sagunson nga bagyo, gideklarar ni Presidente Marcos nga ipa-ubos ang nasud sa usa ka tuig nga state of calamity sa tumong nga mapadali ang pag-rehabilitate sa mga lugar nga nakasinati og dakong kadaut.  Apan gituohan usab sa mga analysts nga ang maong pagdeklarar magdala usab og dakong risgo sa kurapsiyon.  Maayo unta ang katuyoan kay madali na ang rehabilitasyon apan mahimo usab kini nga pamaagi sa pagsakiyo sa pundo kay relax na man ang proseso sa bidding.  Mao kana’y giingon nga, “Ang dalan paingon sa impyerno, sagad gidayan-dayanan sa mga maayong katuyoan.”  Muleeng!

Dili magbuot ang makililimos

Luyo sa mga pagpanaway kabahin sa P5,000 ug P10,000 nga hinabang gikan sa Presidente ngadto sa mga biktima sa Bagyong Tino, midepensa niini ang Malacañang sa pag-ingon nga pasiuna lamang kini ug nga aduna pa’y laing madawat ang mga biktima ingon man ang mga kagamhanang lokal.  Adunay punto ang mga pagsaway kay gawas nga gamay ra kuno ang hinabang, wala pa’y kaseguroan kon kanus-a kini madawat.  Dili usab mapapas sa hunahuna sa tawo ang dakong budget sa wala mahuman nga flood control projects. Ang depensa sa Malacanang, daw haum sa panultihon nga “Dili angayan ang makilimos nga magbuot kon pila ug kon unsay ihatag.”  Madahaan!

Wa mosubay sa schedule

Adunay ilusad nga imbestigasyon ang Malacanang, pinaagi sa nasudnon’g buhatan sa Department of Interior and Local Government, sa mga opisyal sa lalawigan sa Sugbo nga giingon milagwang paingon sa Europe atol sa pagkuso-kuso sa Bagyong Tino sa probinsya sa Sugbo.  Wala man tingale intensyon nga molihay ang mga opisyal sa ilang responsibilidad.  Nahinayak lang sila pagbiyahe nga naatol sa paglampurnas sa bagyo. Matud pa bitaw sa presidente, “Unsaon man sad ni’ng bagyo nga di na man mosubay sa schedule”.  Ateerr!

Nakakita sa sign, wala sa enforcer

Gimando ni Labor Secretary Bienvenido Laguesma ang pagpa-imbestigar sa pipila ka mga business process outsourcing (BPO) companies nga giingon’g mipugos sa ilang mga empleyado pagpatambong sa trabaho bisan pa man taliwala sa pagkuso-kuso sa bagyong Uwan. Sagad sa mga customer sa BPO atua mahimutang sa laing nasud diin wala makasinati sa bagyo ug dili usab makasabot sa kahimtang sa mga empleyado.  Makapahinumdom sa  nadakpan nga driver nga  sa dihang gipangutana sa enforcer kon wala ba diay siya makakita sa “No Left Turn” sign, igo lang mitubag nga “Nakakita man ko Sir, pero wa man ko makakita nimo.” Pagkatoytoy!

Damgo nga kasulbaran

Dako ang pagtoo ni Presidente Marcos, Jr., nga ang Oplan Kontra Baha Program sa kagamhanan makapakunhod na sa baha sa Metro Manila ug ubang kasikbit nga lugar.   Mahulog ra gyud nga damgo ang ang pagtoo sa presidente nga mamenosan ang baha.  Komprehensibo ang gikinahanglan’g solusyon ug dili paigo ang paghabwa lang sa mga basura sa mga waterways.   Komento pa sa akong amigo, “Magsugod na pud og laing programa apan kon huna-hunaon, dugay ra man unta nasulbad ang baha kon wala pa sakiyoha ang binilyon nga budget.”  Fezteleern!