EDITORYAL — Serbisyo sa utilities dako unta’g tabang

Mag-unom na ka adlaw gikan sa pag-igo sa makadaut kaayong bagyong Tino, apan daghan pa gihapong mga lugar ang wala pa mabalik ang supply sa ilang tubig, kuryente ug signal sa telekomunikasyon.

Ang mga utility companies nagpagawas na og tagsa-tagsa nila ka mga pamahayag kabahin niini. Sila pud nakaangkon og daghang kadaut sa ilang mga pasilidad ug instalasyon mao nga naputol ang ilang serbisyo.

Samtang tuod walay gipili ang maong bagyo kay apektado gyud tanan, ang pagbalik unta dayun aning mga batakang serbisyo nga gikinahanglan kaayo sa mga biktima, dako og matabang para sila makapaspas og bangon.

Ang mga utility companies mirason nga daghan sa ilang mga poste, mga kable sa telekomunikasyon ug mga tubo sa tubig ang nangaguba tungod sa baha.  Natural gyud kini nga senaryo matag dunay mga kalamidad, apan samtang nagkadugay ang pagbalik sa ilang mga serbisyo, nagkasamot ang kalangay sa pagbangon sa mga konsumidor gikan sa kadaut.

Pinakaimportante gyud sa tanan mao ang tubig kay mas maayo pang wala pay kuryente  kaysa limpyong tubig nga magamit sa mga tawo.

Ang telekomunikasyon importante sab kaayo para sa tanan, tungod kay pinaagi niini makapangayo og tabang ang mga tawo ngadto sa ilang mga kabanay o mga kaila.

Pinaagi unta aning  walay pagkaputol nga telekomunikasyon atol ug human sa pag-igo sa katalagman, mas paspas gyud ang pagresponde sa mga otoridad tungod kay makatawag man dayun ang mga tawong nagkinahanglan og tabang.

Apan tungod kay hasta pud sila nagrabehan sab, wala na hinuon sila makatabang sa mga tawo sa panahong gikinahanglan kaayo ang ilang serbisyo.

Dili lang kini karon  nahitabo ang katalagman, kondili makadaghan na. Apan hangtud karon wala pa gihapoy epektibong pormula ang mga utilities aron mas paspas nilang mapabalik ang ilang serbisyo nga gikinahanglan kaayo sa mga tawo.