Problema sa mga Frasco
Ambot unsay problema sa manag-agaw nga Kongresista Duke Frasco sa ikalimang distrito sa Sugbo ug Mayor Aljew Frasco sa Liloan. Hangtod karon, lima ka adlaw na human sa bangis nga bagyong Tino, wala pa sila kaangkon og:
• Kaisog sa pag-angkon nga nilarga sila paingon sa London bisan sa pasidaan sa Pagasa nga mahimong maigo sa katalagman ang ilang distrito ug lungsod;
• Kaalam sa pagpasabot nganong nakaako sa pagbiya sa dako nilang responsibilidad sa katawhan para sa iresponsable nga laag sa Europe; ug
• Katakos sa pagpangayo og pasaylo sa ilang pakauwaw.
* * *
Nakatabang nilang Duke ug Aljew ang mga kapikas sa kinabuhi nga mas lig-on pagpanalipod sa ilang bulilyaso:
• Si Christina nipahibawo nga niadto sa London para sa turismo (sa walay pagpasabot nganong gitangkil si Duke aron dili maapiki kon naglibog pang ang iyang bana unsaon sa pag-esplikar nganong walay markang Frasco ang pandesal nga gipanghatag ngadto sa mga gibanlas sa baha; ug
• Si DonaBella nipasalig nga si Aljew chill lang (tingali kay 13 degrees celsius sa ilang giadtoan) kay walay mahimo, sama sa mga mayor nga nagpabilin, pagpugong sa bagyo.
* * *
Wala ba masayop ang katiguwangan sa mga Frasco nga nisugo nga sila rang Duke ug Aljew, isip mga anak nilang Dodong Dako ug Dodong Gamay, ang maka-timpla sa rosquillos ug uban nilang mga produkto? Kon mapanagan-on sa pag-angkon og responsibilidad sa ilang binuhatan, peligrong molikoy ang timpla sa mga adlaw nga mahiagom og mga pagsuway.
Dili kaha maayo nga sabutsabotan na nila nga ibalhin ang importanteng tahas ngadto nilang Christina ug DonaBella?
* * *
Kaisog ni Christina paghimo og desisyon bisan usahay pataka (sama sa paugat sa Love the Philippines) mo-garantiya nga dili malangan ang ilang produksiyon (bahala kon mas lami nang utap sa Hillside Bakeshop sa Carmen). Ka-lunod-patay ni DonaBella makahimong mas agresibo sa ilang pag-alkontra sa mga karibal (nagkadaghan nang ganahan sa Conching).
Pero kinahanglang tudloan sa labing brayt sa katiguwangan si DonaBella nga dagat (dili baha) ang gihiwa (wala gipahunong) ni Moises. Angay sang tambagan sa labing mapailubon nga katiguwangan si Christina nga dili maayong mag-usab-usab og ngalan sa walay konsultasyon. Kakuyaw kon makamata sila usa ka buntag nga ang “Titay’s” mahimo nang “Lalay’s.”
* * *
- Latest
