atay Digong madugay pa pagkatanggong

Ang pagbasura sa International Criminal Court (ICC) ngadto sa mga petisyon nga gipayil sa defense lawyers ni kanhi Presidente Rodrigo Roa Duterte (PRRD), diin maoy tumong sa iyang defense lawyers nga gipangulohan ni Atty. Nicholas Kaufman, nga mapadali ang pag-dismiss sa kasong crimes against humanity, mga dautang tilimad-on kini nga dili patas ang maong banyagang hukmanan.

Usa sa petisyon mao ang pag-inhibit sa duruha ka ICC babayeng huwes: Judge Reine Adelaide Sophie Alapini-Gansou ug Judge Maria del Socorro Flores Liera tungod sa posibleng mahimo silang bias diha sa ilang paghukom. Kini tungod sa mga balitang mibaha sa social media nga suod kuno si First Lady Liza Araneta-Marcos sa naasoyng mga huwes. Hinuon, kusganong giklaro sa mga mainstream media nga fake news kuno kini. Ang pangutana: ‘Kinsa ba ang mas gituohan sa katawhan karon nga mohatod og tinuod-patas nga balita: ang social media, o mainstream media?’

Si Kitty Duterte, kinamanghorang anak ni PRRD, nalipay kay nakatimaho siya nga makauli na ang iyang pinanggang amahan sa Pilipinas. Si Honeylet Avanceña gikang miduaw ni PRRD sa ICC detention facility, dihang gipangutana sa mga Overseas Filipinos Worker (OFW), kon makagawas na ba si Tatay Digong, dako-tam-is kaayog pahiyom nga mitubag: “Aw, oo, makapauli na!”

Si Vice President Sara ‘Inday’ Z. Duterte, mipahibalo usab sa publiko, nga walay hurisdiksiyon ang ICC sa Pilipinas ug klarong ilegal ang pagka-detain ni PRRD sa ICC. Busa, ma-dismissed ra ang kasong giatubang niini ug makauli dinhi sa atoa.

Ingon niini ka positibo ang panglantaw sa mga Duterte, kinsa gusto nang mahibalik si PRRD sa Davao City aron magpadayon sa pagpangalagad sa katawhan isip walay pilde-pildeng mayor nga nakapauswag pag-ayo sa ilang lugar, nakapahimo niining pinakamalinis ug pianakaluwas nga maayong puy-an nga dakbayan.

Apan subo paminawon. Nagtinguha-nangandoy man tuod ang milyonmilyong diehard Duterte supporters nga makauli sa labing daling panahon si Tatay Digong, medyo madugaydugay pa gyod ang iyang pagkatanggong sa ICC, The Hague, Netherlands. Kay bisan pa sa dakong kadaogang nakab-ot ni PRRD sa miaging eleksiyon, sa makabungog nga walay undang panawagan sa tibuok kalibotan nga ‘Bring PRRD home!’, ang ICC judges nagpabilng bungol-buta sa pulidong kamaturoan nga ilang nakita.

Ngano kaha?