Naputol nga bakasyon

Naklaro na. Nganong giputol ang bakasyon sa London nilang Kongresista Duke Frasco ug Tourism Secretary Christina Garcia Frasco uban sa pito ka mayor ug usa ka board member:

Dili tungod sa kabalaka sa mga biktima (kay nisunod unta sa ilang kauban nga si Borbon Mayor Nico Dotillos nga nipahibawo ni Gobernador Pam Baricuatro niadtong Oktubre 27 nga dili siya modayon pagbiyahe tungod sa bagyong Tino); ug

Dili tinuod ang sulti ni Christina nga nagdali sila og balik (imbes mokuyog sa mga mayor nga nangabot sa Nobyembre 5, silang Duke ug Christina pagka gabii na sa Nobyembre 6).

Dili sab tungod sa mga pagsaway batok sa ilang laag, nga gi-sekreto unta pero nabisto tungod ni Tino. Kay masaligon nga walay makatumba sa mga Frasco sa Liloan. Bisan wala matukod ang Children’s Hospital ug bisan wala mahuman ang bag-ong munisipyo.

Masaligon sab nga dili na mabawi sa mga Durano ang ikalimang distrito. Kumbinsido nga ang ilang pakauwaw wala ra sa kumingking sa kaduguon ug kabangis sa karaang pamolitika nga bisan unsaon og kisikisi ug palupalo dili mawaswasan sa bag-ong mga Durano.

Ang tinuod nga rason nga mapanagan-on nga gibiyaan ang 13 degrees celsius nga kahayahay sa London para sa alimuot ug lapukon nga Liloan mao ang pagduaw ni Presidente Ferdinand Marcos Jr. sa evacuation centers gahapon, Nobyembre 7.

Wala sila maikog sa mga botante. Pero kurog sa presidente. Nga magtungkawo sa Malakanyang sa mosunod pang tulo ka tuig. Nga kon dili nila sipsipan peligrong ma-blangko ang ilang bahin sa minilyon ka pesos nga mga proyekto.

Si Christina ray niangkon nga nagpa London. Bisan walay nangutana. Gani nilang tanan siya ray dunay balidong rason pagbiyahe. Pero wala ipasabot nganong gitangkil ang iyang bana ug mga alyado sa politika.

Hangtod sa akong pagsuwat niini, tak-om silang Duke ug kaubanan nganong nagpaugat sa ilang kiat bisan sa abundang pasidaan nga si Tino moigo sa ilang distrito. Walay nakahunghong nga ang pag-epal dayon human sa taas nga biyahe mahimong mopasamot sa ilang jet lag. Hinaot dunay katiguwangan nga makatambag nga ang padayong pagpamakak sa ilang nahimutangan atol sa pagkabanlas ug pagkalumos sa mga biktima makalaglag sa ilang kalag. [email protected]