Calamity loan sa SSS

Dear Atty. Divine,

Usa ko sa mga nabiktima sa bagyo sa Cebu ug na damage gyud ang tanan namong gamit sa balay lakip na ang among mga appliances tungod sa baha. Naproblema mi karon sa among inadlaw nga gastuhan. Ang akong pangutana kay miyembro man ko sa SSS, mamahimo ba ko nga maka avail og loan sa SSS tungod sa maong kalamidad? -- Shiela

* * *

Dear Shiela,

Yes, gipahibawo na sa SSS nga sugod Nobyembre 6, mamahimong maka huwam og P20,000.00 ang mga miyembro ubos sa SSS Calamity Loan program. Kining maong loan assistance gitumong aron ang mga miyembro adunay pundo nga magamit dayon panahon sa emergency.

Ang mga qualified members sa SSS mamahimo makapahimus sa maong calamity loan ug aduna kini interest nga 7% matag tuig ug kinahanglan nga bayran kini sud sa duha ka tuig. Ang mga miyembro nga mo-qualify sa loan mao kadtong nagtrabaho og nagpuyo sa lugar nga gideklarar na ubos sa state of calamity, adunay dili mominus 36 months nga contribution, adunay active SSS online account, way mga kanhi utang sa SSS, 18 ngadto sa 64 anyos ug way record sa fraud sa SSS.

Kining maong loan program gitanyag sa SSS hangtud sa Disyembre 5 ug mamahimong i-file ang inyong application online. Mamahimo sab kamong mobisita sa buhatan sa SSS aron sa pag-avail sa calamity loan. Daghang salamat.

Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.