Ang salamin

Samtang naglakaw lakaw ang usa ka bisita sa usa ka museum may Nakita siya nga kwadro diin sulod niini ang laksot kaayo nga nawong.

Iyang gitawag ang curator sa maong museum ug iyang giingnan kun kinsa ang naghimo sa maong painting nga laksot man kaayo kini.

Ang curator nitubag sa mas prangka nga pagkasulti: “Dili man na painting sir, kondili salamin man kana ug imong nawong ang imong Nakita!” kataw-anan apan nagdala kini og kamatuoran alang kanatong tanan.

Kini tungod kay kusog kaayo kitang makasud-ong sa kabati sa atong palibot.

Sa kangil-ad sa atong isigkatawo ug ang kangil-ad mismo sa kalibutan diiin kita nagpakabuhi.

Apan kun buot hunahunaon kining mga butanga, ang tanan natong mga Nakita mga reflection lamang sa paagi nga gisud-ong nato ang atong kaugalingon.

Tungod lagi kay malisud alang kanato ang pagsud-ong sa atong kaugalingon, atong gimbut-an nga atong sud-ongon ang uban kaysa atong sud-ongon ug ila ilahon ang atong kaugalingon.

Kun Nakita pa lang nato ang kaanindot sa kinabuhi nga hinatag kanato nan, dili lisud ang pagsud-ong sa kinabuhi ingon nga maayo alang sa uban.

Imbis atong himoong kritikal kaayo ang atong paghukom sa uban mas maayo tingali nga atong himoon nga mas kritikal ug isktrikto ang pagsud-ong nato sa atong kaugalingon aron pinaagi niini atong mas masabtan ang uban diha sa pinakangil-ad nga episode ug hulagway sa ilang panaw sa kinabuhi.

Sinugdanan sa usa ka tinuod nga kapasayloan mao man ang pag-angkon sa atong mga sala.

Sinugdanan sa kaayohan mao man ang pag-angkon nga sama sa uban kita nagmasakiton usab sa lawas ug kalag.

Sinugdanan usab sa atong kalingkawasan mao man ang pag-angkon nga kita nabilanggo ug padayong nakigharong sa mga demonyo nga nilupig kanato.

Ug labaw nga kita angayang masayud nga bisan kita anaa sa mangitngit nga dalan sa pagka may kamatayon, kita mga salamin diay sa kahingpitang Diosnon.

Gihimo kita niya nga Maayo mao nga maningkamot kita nga magpakaayo ug mamahimong maayo alang sa uban.