Kaniadto suroysuroy, karon sakaysakay

Sa usa ka press conference, giklaro ni Cebu 5th District Representative Duke Frasco ngadto kang Cebu Governor Pamela ‘Pam’ S. Baricuatro, nga ang Liloan Children’s Hospital ubos sa pagdumala sa probinsiya sa Sugbo.

Busa, responsibilidad sa gobernador ang paghatag og igong pundo sa pagpatukod niini, sumala pa sa Republic Act No. 11886, diin si Frasco mismo maoy author, effective June 29, 2022.

Ning maong pamahayag, sama rang naunay sa tari si Frasco sa iyang pagsikad-labok. Sanglit, 2022 pa man diay kining balaora, diin probinsiya sa Sugbo puwerting datoa, ug ang gobernador iyaha pa gyong mother-in-law, unya nganong wala man siya makapangayog P200M budget alang sa Liloan Children’s Hospital project?

Kay matod pa, sayonsayonon ra man gani sa kanhi gobernador ang paggastog ginatos ka minilyon sa iyang Suroysuroy sa Sugbo? Samot na, kon gikuhit pa pirme ni Frasco iyang mother-in-law niadtong higayona sa P200M niyang gikinahanglan?

Apan nganong wala man kini buhata ni Frasco kaniadto? Nganong karon pa man, diin ning pagsulat, Day 51 pa lang si Gov. Pam sa iyang pagpangalagad?

Nahatanom pa, mao pay pagsugod niyag tubo. Busa, angay untang ampingan ug tabangan nato ug nilang mga hardinero sa politika.

Nungkang, pasipad-an ug pangitaan dayog mga bunga. Mao nga hisabtan nako ang reaksiyon ni Gov. Pam niining maong hitabo.

Atubangan sa media, medyo may kahapdos mihulma sa matahom niyang panagway dihang daw nakapanghupaw nga mituaw: “Kaniadto, suroysuroy! Unya karon, sakaysakay!”

Kaniadto ugod, ang Suroysuroy sa Sugbong programa maoy gihatagag dakong prayoridad ni kanhi Gov. Garcia samtang ang para sa health care program ug pagtukod og mga ospital napadaplin na lang.

Tingale, maoy hinungdan nganong naikog si Frasco mamarayeg para sa iyang hospital project. Diin imbes barawon, iya hinuong gisakyan.

Apan ning higayon nga gipahingusgan ni Gov. Pam ang health care program sa probinsiya sa Sugbo, nga gihangop-gidayeg-gikalipay sa mga Sugboanon, gisakyan sab dayon kini ni Frasco.

Nahimo siyang aktibo nga mahuman iyang proyekto, diin ang gobernador maoy iyang gipurihisyo.

Maayo man ang tumong ni Frasco. Apan may igo bang pundo ang Kapitolyo para niini?

Mao nga igo na lang si Gov. Pam sa pagpanghupaw-tuaw: “Sakaysakay pa more!”

Simple, pero may kahulogang halawom!