Pagpamalandong matag Domingo

Matag Nobiyembre 02 atong saulogon ang paghandum sa tanang mga nangamatay. Daghanan nato ang mag-ambahan adto sa mga nagkadaiyang mga sam-ang aron mohalad og mga pag-ampo alang sa atong mga kaigsuonang nangamatay.

Ato sab makita ang daghang mga talan-awon sa mga tawo nga naghalad og mga pagkaon ingon man mga bulak sa mga lubnganan. Anaa usab ang mga kaparian sa paghalad og mga santos nga misa alang sa mga nangamatay.

Reyalidad alang natong mga tawo ang kamatayon.

Walay makaikyas niini. Kitang tanan mangamatay gayud. Kanus-a kini mahitabo wala ta masayud ug kun sa unsang paagi nato kini masinati wala pud kitay kasayoran. Kini tungod kay ang kamatayon maoy bugtong Seguro ning kinabuhia.

Sa laing bahin ang kamatayon dili period kun ang katapusan. Ang kamatayon maoy atong pagkahimugso padulong sa kinabuhing walay katapusan.

Atong birthday padulong sa eternidad. Mao nga dili kita angayang mahadlok sa kamatayon sanglit moagi man gyud kitang tanan niini.Ang angayan natong himoon mao nga mangandam kita. Sa praktikal nga paagi atong andamon ang atong mga lubnganan ug mga lungon nga higdaan.

Apan ang pinakanindot nga pagpangandam mao man ang espirituhanong pagpangandam. Ang paghalad sa atong kinabuhi adlaw adlaw ngadto sa Dios nga maoy tag-iya ug tinubdan sa tanan nga atong nahuptan.