Linungkabay

Dili pa lang dugay daghang mga parokya ning atong artsidyosesis ang gipanglungkab ug gipangkawatan. Gihimong operation lungkab ang mga nagkadaiyang mga parokya.

Naapil pa ang akong parokya nga gialagaran. Naay CCTV tuod apan walay gamit kay walay monitor nga gibilin. Sa dihang kini naayo na nakita nga dunay duha ka mga cameras niini ang dautan ug dili na mapuslan.

Gikinahanglan ang pag-ayo. Naabot ang mga kapulisan buntag na aron maapil sa ilang accomplishment report ang kawat nga malampusong nahitabo.

Dunay mga tanod ug dunay mga trabahante sa contractor nga sadya kaayong namahaw human sa insidente.

Walay tataw nga guba tingali may master key ang hingtungdan uban sa iyang konsabo nga naniid lamang sa mga panghitabo.

Sa laktod wala nay kasaligan karong panahona. Kini tungod kay walay pagpakabana ang kadaghanan ug dili kaayo sila sakitan kun ang simbahan lamang ang mawad-an.

Gani tingali daghanan ang nangandoy nga maalaut ang simbahan.

Dili ni mahitungod sa kakabus ni dili ni mahitungod sa pagpanalipod sa tawhanong katungod kanilang mga kawatan nga angayang putlan sa mga kamot aron makaamgo nga usa ka dakong krimen ang pagkuha sa dili nimo hinagoan.

Sa laing bahin, prevention is better than cure mao nga kinahanglang magmatngon kita.