Transparency ni Cindi
Niinsistir si Lapu-Lapu City Mayor Cindi Chan nga ang iyang pagbisto sa top secret nga location sa missile storage facility dili atraso sa national security kon dili pagpatigbabaw sa transparency. Human nibadlong sa atraso, bahala nang Armed Forces of the Philippines (AFP) niya.
Pero angay’ng hangpon ang paghatag ni Chan og importansiya sa transparency. Maong tugoti nga among ipaambit ang pipila sa mga awhag (dili ang tanan kay mas daghang balikas ug bugalbugal) sa viewers sa programang “Baruganan” sa YouTube nga hingpit na lang gyong gakson ni Chan ang transparency:
* * *
Ipagawas nang iyang Statement of Assets, Liabilities and Net Worth kay si Kongresista Raymond Mendoza sa TUCP Partylist pay Sugbuanong politiko nga boluntaryong nipakita sa SALN;
Mohatag siya og kuwentada pila na ka milyon ka pesos sa buhis sa mga Oponganon ang naggasto sa pagpahimo og tarps sa ilang nawong ug ngalan nga gibitay sa hapit tanang poste sa suga sa syudad (apil na sa location sa missile storage facility);
* * *
Mopasabot siya sa mga Oponganon kanus-a sila mohunong sa pagpamugos og butang sa ilang nawong ug ngalan sa mga proyekto ug kabtangan sa gobyerno nga gidili sa upat ka balaod (General Appropriations Act sa 2025, DILG Memorandum Circular No. 2010-101, COA Circular No. 2013-004 ug Code of Conduct and Ethical Standards for government officials and employees, o Republic Act 6713);
Mo-esplikar sa mga Oponganon nganong gitugotan ang ilang mga kadugo nga QM Builders, Quirante Construction ug Adamant Development Corporation pagtrabaho og mga proyekto sa syudad bisan sa pagdili sa mga transaksiyon uban sa mga paryente hangtod sa fourth civil degree sa consanguinity o affinity;
* * *
Mosaad sa mga Oponganon nga badlungon ang iyang bana (Kongresista Ahong Chan) ug anak (Kapitan Daday Chan) nga gipasanginlan nga nag-wang-wang sa ilang convoys ug busa nakalapas sa duha ka balaod (Presidential Decree No. 96 sa 1973 ug Administrative Order No. 18 sa 2024); ug
Maningil sa iyang anak (Daday) nga wala pa makahatag sa publiko sa link sa Shopee nga iyang ginganlan niadtong Agosto nga gipalitan sa mahalon nga mga sinina ug alahas nga gisalida sa ilang biyahe sa Europe sa wala pa gi-private ang iyang Instagram account.
* * *
- Latest
