Top secret gi-epal
Kon nangita silang Kongresista Ahong Chan ug Mayor Cindi Chan og rason sa pag-undang sa pagpamugos sa puol na nilang mga nawong ug ngalan sa mga karatula sa hapit tanang poste sa suga ug mga sakyanan ug ubang kabtangan ug mga proyekto sa Lapu-Lapu City, mao na kini:
Pormal nang gitawag ang ilang atensiyon sa Armed Forces of the Philippines (AFP) ug sa Philippine Navy (PN) sa seryusong hulga sa nasudnong seguridad nga nahimo sa iresponsable nilang pagpahibawo aron lang maka-epal sa nahimutangan sa gitukod nga missile storage facility.
* * *
Tungod sa pagbutang og higanteng tarp nga kumpleto sa ngalan sa barangay ug baseng militar ug pagpa-video ug pagpaletrato sa luna nga gihimoan sa groundbreaking niadtong Pebrero 21, si Mayor Cindi Chan (kongresista niadtong higayona) nibutyag sa top secret sa militar.
Nakatultol na karon ang China ug ubang kanasuran nga posibleng dunay dautang tuyo sa Pilipinas sa armas ug depensa pila ka kilometro gikan sa Mactan Benito Ebuen Air Base, usa sa mga baseng militar nga makasulod-gawas ang mga sundawo ug mga armas sa Estados Unidos.
* * *
Giangkon ni Chan ang kredito sa proyekto. Bisan dili iyang kuwarta ang gigasto. Kon dili ang pundo sa Tatag ng Imprastraktura para sa Kapayapaan at Seguridad (TIKAS), hinugpong programa sa Department of National Defense (DND) ug Department of Public Works and Highways (DPWH).
Kon nagduda pang China ug ubang nangespiya unsa ka-importante ang sekreto nga iyang gibisto, gideklarar ni Chan sa iyang diskurso nga ang facility “would house valuable military assets and enhance the city’s role in supporting national defense infrastructure.”
* * *
Segun sa retiradong opisyal sa militar nga tigpaminaw sa among programang “Baruganan” sa YouTube, ang mosunod nga mga kaso mahimong ipasaka batok ni Chan:
Paglapas sa Revised Penal Code, Article 229 (Revelation of Secrets by an Officer);
Paglapas sa Republic Act No. 3019, Anti-Graft and Corrupt Practices Act, Section 3(e), kay iyang pataka makadaot sa gobyerno;
Paglapas sa Local Government Code (Republic Act No. 7160), Grave Misconduct, Neglect of Duty, o Dishonesty; ug
Paglapas sa Republic Act No. 6713 (Code of Conduct and Ethical Standards for Public Officials and Employees), tungod sa pagbudhi sa nasudnong seguridad.
* * *
- Latest
