Tambag ni Quirante
Kon tinuod ang istorya nga si Allan Quirante sa QM Builders gipabayad sa mga politiko sa ilang junkets sa nagkalainlaing kanasuran, ka wala nilay utang kabubut-on. Kasagaran tak-om sa pasangil nga si Quirante apil sa labing kawatan sa flood control projects.
Pipila gikataho nga wala na gani motubag sa iyang mga tawag sa telepono. Humot si Quirante niadtong napuslan pa. Karon gilikayan na sa kabalaka nga mapiskan sa mga pasangil batok niya. O kumbinsido nga igo nang bayad ang paghatag sa QM sa kinadak-ang mga proyekto sa ilang mga teritoryo.
* * *
Sa kadaghan sa mga senador, kongresista ug mayor nga sikit ni Quirante, duha ray nidapig niya, pero pulos inutil pagsagang sa agresibong mga imbestigasyon sa Department of Trade and Industry (nga nikiha ug posibleng mosuspenso na sa iyang lisensiya), Department of Public Works and Highways (DPWH), Independent Commission for Infrastructure (ICI), Ombudsman, Bureau of Internal Revenue (BIR) ug Senate Blue Ribbon Committee:
Si Dumanjug Mayor Gungun Gica gikahadlokan sa iya rang munisipyo; samtang si DPWH 7 Regional Director Danilo Villa gipa-esplikar sab sa bastos nga salida sa iyang katigayonan.
* * *
Bugtong makadupa ni Quirante mao ang Malakanyang. Diin wala siyay kumpare. Maayo pang iyang pag-umangkon, si Jonathan Quirante, kay nakaamot og P1 milyon sa kampanya ni Presidente Ferdinand Marcos Jr. niadtong 2022 (nga kalapasan sa Omnibus Election Code).
Maong walay mahimo si Quirante kon human suspensoha ang iyang lisensiya, gigaid ang iyang chopper ug giapil sa immigration lookout bulleting order (ILBO), i-freeze sab ang iyang bank accounts ug pasakaan og mga kaso nga walay piyansa.
* * *
Dili kasinahan ang sitwasyon ni Quirante. Kinabug-atan ang responsibilidad kay siya ang pangulo sa bilyonaryong negosyo nga nameligrong mahagsa. Pero duna siyay mahimo nga, samtang dili makapapas sa iyang mga kaso, makabawi og diyutay sa kadungganan sa ilang pamilya:
Nganlan niya ang tanang politiko ug mga opisyal sa DPWH nga apil sa kawat; kumpleto sa mga detalye pilay nabolsa sa kada usa, diin ug kanus-a ang hinatagay sa kuwarta (unsay gisudlan nga mga bag ug gikargahan nga mga sakyanan), ug sa unsang mga transaksiyona. Bonus na lang kon himuon siyang state witness (kon mosugot nga i-uli ang dili iya).
* * *
- Latest
