Nag-iyahay'g pangurakot

Namahayag si DTI Secretary Cristina Roque nga dili na tugotan nga makapanag-iya og construction company kadtong mga miyembro sa Philippine Contractors Accreditation Board (PCAB), ang ahensiya ubos sa DTI nga gitahasan pag-accredit sa mga contractor, tungod sa gitawag nga “conflict of interest.” Nag-iyahay na lang gyud ang mga kanahan sa pagsalmot sa kurapsiyon ginamit ang ilang gahum.  Makapahinumdum sa bata nga, samtang nagkaon og kendi, nangutana sa laing bata kon ganahan ba siya mangayo. Sa dihang mitando ang laing bata, giingnan na hinoon nga, “Aaw, palit og imoha.”  Fezteleern! 

Gipili ra ang balingon

Nagtuo si DPWH Secretary Vince Dizon nga adunay pipila ka akusado sa kaso’ng kurapsyon sa flood control ang mabilanggo ug adto na mag-saulog sa Pasko sulod sa prisohan ug nga ang una’ng mabilanggo mao kadto’ng mga enhinyero sa Bulacan DPWH Engineering District ingon man ang managtiayon’g Discaya.  Mora’g giuna ra man pagbaling ang mga “bolinaw ug ibis” ug wala una giapil ang mga “mamsa”.  Makapahinumdum sa bungi nga sa dihang gidayeg sa style sa iyang biste nga gisi-gisi, gikan sa karsones paingon hangtod sa T-Shirt, mipasidaan sa nagdayeg nga, “Diha ra kutob sa dughan ha, ayaw i-apil diri dapit sa ako’ng simod.”  Madahaan!

Nag-anad-anad na daan

Milusad karon ang National Bureau of Investigation (NBI) og halapad nga imbestigasyon sa sunog nga naka-ugdaw sa DPWH office sa Quezon City nga maoy nahimutangan sa mga records nga nalambigit sa flood control projects.  Nagtuo ang NBI nga posible’ng arson ang nahitabong sunog.  Tanan paagi buhaton sa mga kanahan’g kurakot lakip na ang pagdula og kalayo aron lang matabunan ang ilang tinonto.  Komento pa sa akong amigo, “Nasayod na tingale ang mga kurakot nga impiyerno ang ilang padulngan mao nga nag-anad-anad na lang sila’g sinati sa kainit sa kalayo nga wala na unya’y pagkapalong.”  Muleeng!

Isaad ang tanan

Mipasalig si DILG Secretary Remulla nga wala’y ihatag nga special treatament alang niadtong mga empleyado sa gobyerno ngga madakpan ug mabilanggo tungod sa ilang pagkalambigit sa mga “ghost” flood control projects.  Ikahinangop sa katawhan kon matinuod ang pasalig ni Remulla, labi na gyud kon adunay kongresman nga maapil.  Apan sa dili pa, kinahanglan nga aduna una'y mataral ug dinhi ra ang laay.  Hinaut nga dili tamdon ni Remulla ang panultihon nga, “Kon buot ka’ng magmalampuson dinhi sa kalibutan, isaad ang tanan’g butang apan walay usa nga imong pagatumanon.” Fishkots!

 Sayon ilhon ang buaya

Nabatyagan sa mga tourism workers sa Badian, Cebu, ang lugar nga baniog kaayo sa canyoneering adventure didto sa Kawasan Falls, ang epekto sa sayop nga impormasyon nga mikatap sa social media nga adunay kadaut nga nahitabo sa ilang tourism sites tungod sa linog nga nasinati didto sa amihanang bahin sa Cebu.  Bisan kon ang tuyo sa ubang vlogger mao lang unta ang pag-post og mga content, angayan hunahunaon nga aduna kini lintunganay.  Matud pa bitaw sa akong uyoan, “Lisod na karon ilhon kon unsay tinuod sa social media.  Mas sayon pa ilhon ang mga buaya kay makita man ang ilang mga bangkil.”  Pagkatoytoy!