Sa Sogod gyud?

Para nako, dili maayo ang plano ni Cebu 5th District Congressman Duke Frasco nga maghimo og laing international airport sa Cebu ug adto kini sa lungsod sa Sogod.

Ang iyang argumento nga sa uban kuno nga mga "major cities" sa kalibutan, duna gyuy dapit nga duha ang ilang airport. Sama kuno sa Manila, naa ang NAIA ug may airport sab sa Clark.

Nabalaka si Frasco nga kon dunay problema ang Mactan airport ug di katugpahan og mga international flights, sakripisyo kuno kaayo ang mga pasahero.

Apan di ba kaha dakong sakripisyo sa mga pasahero sa eroplano nga mo-travel og kapin sa 60 kilometros paingon, ug gikan sa Sogod, paingon dinhi sa siyudad nga hilabihan ka traffic ang agianan nga karsada?

Buyno nindot nga dunay ikaduha nga international airport, ug nganong anha man gyud himoa sa Sogod? Tungod ba kay sakop kini sa fifth district?

Mas maayo tingali nga palapdan usa ang karsada gikan sa maong dapit paingon dinhi sa siyudad kon gusto man gyud ni Frasco nga maghimo og secondary international airport diha sa Sogod.

Mas maayo tingali nga si Duke maninguha nga makagahin og dakong pundo nga salapi ang kagamhanan nga gamiton sa road widening project gikan sa Sogod paingon sa Cebu City.

Human mapalapdi ang karsada ug tulin na ang pag-agi sa mga sakyanan, dihang higayona nga pwede na ang gisugyot niyang secondary airport diha sa Sogod.

Pero ngano nga anha man gyud himoa sa Sogod ang secondary international airport? Kon mangita ta og laing lugar, pananglit diha lang ba sa Cordova, di ba maayo?

Maayo man gud diha kay duol ra kaayo sa Cebu City ug tulin ang pagdagan sa sakyanan agi sa Cebu City-Link Express Way, ang third bridge.

* * *

Kon binuwan na gyud ang paghatag sa cash assistance sa mga senior citizens dinhi sa Cebu City, magpili ang mga seniors nga wa na dinhi sa siyudad magpuyo.

1.) Di na lang sila mokubra kay alkanse ang P1,000 nga makubra nila kay sa magasto nila sa plitehan sa barko ug uban pa nga gastohan kon moanhi gyud sila.

2.) Mobalik mapugos sila pagbalik sa pagpuyo dinhi sa magahob nga sigudad aron makadawat sila pirmi og tag P1,000 kada buwan, kay kon moabot og tulo ka higayon nga di sila makakubra sa seniors cash assistance, tangtangon na ang ilang ngan sa mga makadawat.

Aw kon mahitabo ni, mangalipay kadtong mga tinuod gyud nga dia nagpuyo sa Cebu City kay daghan man kanila ang mapuli sa listahan.