EDITORYAL - ProteksIyon sa media

Nagpabilin gihapong naa sa top 10 ang Pilipinas sa pinaka-peligrosong nasud para sa mga tigbalita. Kini human usa ka brodkaster sa Bicol ang nakabsan sa kinabuhi human gipusil niadtong adlaw nga Martes, Oktobre 21,2025.

Matud pa sa report, ang 54 anyos nga tigbalita nga si Noel Bellen Samar usa ka radio reporter sa Kadunong Internet TV ug  92.3 DWIZ, gipusil  niadtong adlaw nga Lunes sa buntag sa Guinobatan, Albay.

Gikatakda unta siyang operahan tungod sa upat ka samad pinusilan sa dughan ug tiyan apan nakabsan kini sa kinabuhi pagkasunod adlaw.

Nanawagan karon ang Commission to Protect Journalists (CPJ), ang National Union of Journalists of the Philippines Albay Chapter sa mga otoridad ilabi na kang Presidente Ferdinand Marcos Jr. pagpanigurong mahunong na kining walay-kahadlok nga pagpatay ilabi na sa mga sakop sa media.

Lakip sab ang pagsusi kung may kalabotan ba sa iyang trabaho ang motibo sa pagpatay kaniya o personal nga problema. Matud pa sa grupo kun dili kini masanta, magpadayon kining mga susama ani nga krimen batok sa mga sakop sa media.

Ang Presidential Task Force on Media Security (PTFOMS) nakigalayon na sa Special Investigation Task Group aron pagsigurong manubag sa balaod ang mga naghimo nini. Apan ang pangutana molampos kaha sila?

Ang Pilipinas ika-siyam sa 2024 Impunity Index sa kalibotan nga ang kinabuhi sa mga sakop sa media naa kanunay sa peligro.

Subo kaayo kining palandungon nga ang tighatud og mga impormasyon ug kasayuran para sa katawhan mao naman hinuoy kuwang sa proteksyon.

Kini tungod kay kasagaran sa mga mipapatay og mga taga media mga impluwensiyadong mga tawo nga gituohang ang uban naa sa gobiyerno nga nahadlok nga mabulgar o nasuko nga gibulgar ang ilang mga binuang.