Latos sa demonyo

Ang bulan sa Oktubre, bulan man sa Santos nga Rosaryo. Giawhag kita nga mag-ampo sa Santos nga Rosaryo. Dili lang matag oktubre kondili matag adlaw gyud sa tibuok tuig. Mao kini ang hagit ug awhag sa mga santos nga nag-una pa kanato. Matud pang Padre Pio nga kun wala kay buhaton pag-ampo sa Santos nga Rosaryo. Kay matag Maghimaya ka Maria kastigo man alang sa demonyo. Nga sa ato pa, ang Santos nga Rosaryo usa man ka hinagiban nga angayang dalangpan batok sa gahom sa kangitngitan.

Mao usab kini ang makahugpong sa pamilya kay matud pa: “The family the prays together, stays together. Kay diha sa pag-ampo sa Santos nga Rosaryo, mas mahimong suod man ang pagpamalandong sa kinabuhi sa atong Ginoo diha mismo sa mga misteryo.

Sa akong bahin, nahimong mapuslanon alang Kanako diha sa paghinay taliwala sa kapaspas sa kinabuhi ang pag-ampo sa Santos nga rosary. Makatabang diha sa paghunong, paghilom. Assurance kini nga diha sa kinabuhi wala ako mag-inusara sanglit anaa man ang Ginoo ingon man ang iyang Inahan.

Kun buot kita mahigugma sa Anak angayan lamang nga higugmaon nato ang Inahan. Matag Maghimaya ka Maria masakitan ang demonyo sanglit dili sila makadawat nga ang usa ka babaye nga si Maria maoy motamak sa ulo sa bitin sa karaang kaaway nga mao ang yawa. Dili sila makadawat nga ang usa ka babaye nga si Maria adunay linain nga luna diha sa kasaysayan sa kaluwasan.

Unta sa atong pag-ampo sa Santos nga Rosaryo atong hinumdoman nga dili gyud mahitabo nga magmadaugon ang gahom sa kangitngit batok sa gahom sa kahayag. Ang kinabuhi sa mga santos nagtudlo kanato nga diha sa pagpamalandong sa mga Misteryo sa Santos nga Rosaryo atong mailhan ang Ginoo ug diha sa pag-ila kaniya unta mamahimo kitang suod. Kita karon mag-ampo: “O Jesus ko Pasayloa kami sa among mga Sala, luwasa kami sa Kalayo sa Impiyerno ug dad-a ang tanang kalag ngadto sa langit ilabina kadtong nagkinahanglan sa imong kaluoy ug panabang.”