Lahi si Regal
Sakto si Atty. Regal Oliva (kaniadto gipasanginlan nga propagandista sa mga Duterte pero karon gipasanginlan sa mga dumadapig sa mga Duterte nga nagbudhi sa kawsa): Kon gusto sa pamilya ug sa mga tigpaluyo nga makagawas sa prisohan si kanhi Presidente Rodrigo Duterte angay silang motuman sa mga lagda sa International Criminal Court (ICC).
Kay kon padayon nilang hudlaton ug bugalbugalan ang mga huwes ug ang institusyon mas makumbinser ang ICC sa padayong pagtanggong niya. Kay maoy labing importante nga panginahanglan sa paghusay sa crimes against humanity nga gipasangil batok niya.
* * *
Angay nga hukman nilang Bise Presidente Sara Duterte ug sa iyang mga igsuon unsay ilang palabihon:
• Pagpasuko aron pagpabilin sa kadasig sa ilang mga dumadapig pinaagi sa pagkondenar sa ICC, pagpasangil nga kakonsabo sa Malakanyang ug sa Central Intelligence Agency (CIA) sa Estados Unidos ug paghudlat nga mag-organisar og puwersa nga moluwas ni Duterte gikan sa prisohan; o
• Tumanon ang hangyo sa ilang abogado pagtahod sa ICC kay bisan gibasura nang interim release mahimo pang kumbinsihon nga walay hurisdiksiyon sa Pilipinas o pag-absuwelto ni Duterte kon madayon ang husay.
* * *
Angay sab nga angkunon unsa kabinuang sa ilang mga pasangil:
• Karong napriso na sa The Hague si Duterte mapagawas lang sa ICC, walay mahimo si Presidente Ferdinand Marcos Jr. ug bisan si Sara kon molampos pagbanos sa Malakanyang; ug
• Hasta si US President Donald Trump inutil sa ICC, nagpabilin ang warrest warrant batok ni Israeli Prime Minister Benjamin Netanyahu bisan giputol ang tanang tabang ug gihudlat nga dakpon silang ICC Prosecutor Karim Khan ug kaubanan.
* * *
Si Atty. Regal Oliva usa sa labing epektibong tigpanalipod sa kawsa sa mga Duterte tungod sa iyang kama-kinaadmanon, kaklaro sa sukaranan sa iyang mga argumento, iyang determinasyon sa pagpatigbabaw sa balaod ug ligdong nga pagpasabot sa iyang gituohan unsay sakto.
Sa pikas nga bahin, samang mga hiyas ug mga prinsipyo maoy garantiya nga dili makadupa si Oliva sa mga Duterte sa tanang higayon. Maong lahi ang iyang panghunahuna sa pamilya ug mga dumadapig. Nga hangtod karon dili pa moangkon sa kamatuoran nga ang ICC ug dili ang masuk-anon nilang mga protesta maoy magbuot sa kapalaran ni Duterte.
* * *
- Latest
