Gidemalas ang CBR

Andam na unta ang tanan alang sa dry run sa unang phase sa Cebu Bus Rapid Transit karong bulana. Apan mikagar kini human pag-igo sa makusog nga linog sa Sugbo kaniadtong Septiyembre 30.

Mao nang gipahibalo sa kagamhanang lokal sa dakbayan sa Sugbo nga diskasi una ang pagpahigayon sa dry run sa CBRT.

Matud ni Mayor Nestor Archival, imbis karong bulana, adto na sa Nobiyembre ang dry run niini.

Gidemalas gyud pag-ayo ang pagpatuman sa CBRT. Aside nga haskang dugaya kini gisugdan gumikan sa makabungog nga pulitika, hanap pa ang realidad sa katumanan sa kinatibuk-an niini.

Phase 1 pa lamang apan gidumog na'g dili maayong tilimad-on ang CBRT project. Ambot kon mosaler ba gyud kini niining panahona nga nagkahuot na ang kadalanan gumikan sa nagkadaghang pribadong sakyanan. Hinuon makasabot usab kita sa side sa mga project proponent niini.

Matud nila nga maingganyo kuno ang katawhan pagbilin sa ilang sakyanan kay lagi mas  convenient ug dali ra ang pagsakay sa CBRT.

Apan lalisonon pa kini. Kay mayoridad sa mga car owner mas mopili gayud paggamit sa ilang sakyanan kay mas gusto silang mopasikotsikot sa mga rota aron dali rang maabot sa ilang destinasyon.

Sa ako nang giingon kaniadto, kon niadtong 1990s o early 2000s pa giimplementar ang CBRT, dako ang tsansa nga mosaler kini. Kini gumikan kay minos pa ang mga pribadong sakyanan sa kadalanan kaniadto.

Apan niining nagkadato na nga middle class, ug tungod lagi sa kakulang sa modernong public transport system dinhi sa Sugbo, dili na ikatingala kini mga pribadong sakyanan nga maoy hari sa atong kadalanan karon.