Maapil kaha sa listahan sa mga nasuspenso?

Nagpadungog-dungog na diha sa social media si Konsehal Pastor “Jun” Alcover nga ang pagbuot-buot sa usa ka local chief executive nga dili mananghid sa konseho moresultra gyud og dili maayo.

Gihimo niyang sanglitanan ang nahitabo sa kanhi mayor sa Borbon nga si Noel Dotillos kinsa gitaktak sa Ombudsman sa iyang katungdanan isip bise mayor na karon sa lungsod tungod sa mga kasong naglambigit sa “illegal disbursement” ug “unauthorized hiring.”

Gawas sa pagkatangtang sa pwesto, gidid-an na sab siya nga makagunit og bisan unsang katungdanan sa gobyerno hangtod sa hangtod.

Ang kaso nagsugod sa dihang gipirmahan ni Dotillos ang pagpanghatag og anniversary bonus sa mga kawani sa kantidad nga tag-P10,000 matag usa nga way pagtugot gikan sa konseho sa lungsod.

Laing kalapasan ni Dotillos mao nga nagbuot-buot siya og lugway sa serbisyo sa iyang asawa isip municipal health officer bisan meritiro na unta sa serbisyo sa way pagpangayo og pagtugot gikan sa konseho sa lungsod.

Nagpadungog-dungog si Alcover diha sa social media unsa ka mahinungdanon ang pagtugot sa konseho sa dili pa mosulod og mga kontrata o mohimo og mga mahinungdanong desisyon ang usa ka mayor. Iyang gilakbitan ang gihimo ni Cebu City Mayor Nestor Archival nga mitugot sa usa ka pribadong  organisasyon aron maoy modumala sa night market diha sa Colon nga wala mananghid sa konseho sa syudad.

Gawas nga way pagtugot sa konseho ang pagpahigayon sa maong night market, labihan pa ka alkansi sa syudad sa maong transaksiyon.

Kini tungod kay samtang mga kawani sa dakbayan ang nagdumala sa trapiko sa dapit ug mga polis sa syudad ang naghatag og siguridad ang pribadong organisasyon nagpahimulos sa mga kabus nga mga negosyante pinaagi sa mahal nga abangan.

Ang pribadong organisasyon nga gidumala sa dili taga dakbayan sa Sugbo giingong nangolekta og P6,000 nga abang matag stall samtang ang syudad P50 ray gidawat isip arkabala matag-stall.

Akong gipangutana si Alcover kun may plano ba siyang mokiha sa Ombudsman batok sa mayor.

Apan ang konsehal way klarong tubag ug igo lang mipaigot pinaagi sa pag-ingon nga “atangan kay mobuto sa kini sa dili madugay.”  Gahikay na kaha siya og kaso batok sa mayor?

Maapil kaha si Archival sa listahan sa mga mayor sa syudad nga nasuspenso sa Ombudsman?