Paglahutay

Pagpamaladnong sa Malangkubong matag Domingo

Oktubre  19, 2025: Ikakawhaag-Siyam

nga Domingo sulod sa tuig

 Mga Pagbasa:   Ex. 17;8-13/Sal. 121/2

Tim. 3;14-4;2/Lk. 18;1-8

Ang mga babaye kaniadto sa kapanohan sa atong Ginoo ingon man ang mga kabataan ang nahisakop sa marginalized sector sa katilingban. Sa ato pa, walay tingog diha sa katilingban. Nagsalig ang mga kababayen-an sa mga kalalakin-an alang sa ilang panginabuhian kinit ungod kay ang ilang katilingban kaniadto patriarchal man.

Ang biyuda kun atong tan-awon naglisud gyud mao nga nidangop siya sa usa ka maghuhukom aron mapanalipdan ang iyang katungod. Ang maong panagtagbo tingali nahitabo diin daghan ang nakasaksi. Bisan pa man kun ang maong maghuhukom walay pagpakabana sa maong biyuda apan ang pagbalibad sa ingon makapabutang man sa iyang reputasyon sa kaulawan.

Mao kini ang hinungdan kun nganong iyang gipanalipdan ang maong biyuda gumikan sa paglahutay niini diha sa paghangyo sa serbisyo sa maong huwes.

Diha sa atong panaw sa pagtuo mahinungdanon kaayo ang paglahutay. Bisan gani sa atong kinabuhi dili man ang kahibalo lamang ang basehan aron kita molampos.

 Gikinahanglan man sa gihapon ang paglahutay. Diha sa atong pag-ampo mahinungdanon kaayo ang paglahutay. Kay diha lamang sa paglahutay kita makapadayon diha sa pagsunod sa Ginoong Jesus nga mao ang Dalan, kamatuoran ug kinabuhi.

Si Santa Teresa sa Avila nagkanayon man nga ang mga tawo nga mosubay sa dalan sa Ginoo ang makasinati gyud sa mga pag-antos. Hinuon kining tanan mahimo man kun anaa ang paglahutay, tinabangan sa grasya sa Dios.