Gov. Pam nay labaw, unta kooperasyon mopatigbabaw

Human na ang midterm election. Ang kanhi flight attendant, Pamela ‘Pam’ S. Baricuatro, maoy midaog sa pagka-gobernador sa Sugbo pinaagi sa makabungog nga landslide votes gikan sa kinabag-ang duot sa mga Sugboanon, kinsa gusto nag kabag-ohan, batok kang incumbent Cebu Governor Gwendolyn ‘Gwen’ Garcia, kinsa dili makatuo nga sa iyang pagmata, si Gov. Pam nay milingkod sa kintas-ang puwesto sa Kapitoloyo puli kaniya.

Dili ikalimod. Bisag napilde na si Gwen, daghan gihapong empleyado, opisyal, Provincial Board Members, local government units (LGU) gikan sa kinaubsan ngadto sa kinatas-an ang nagpabiling loyal kaniya ug matental pagsunod unsay gustong balaod o mga proyektong ipabuhat ni Gwen. Unta, likayan kini sa mga hingtungdang mangangalad. Kay dili na man siya maoy gobernador.

Tapos na ang piniliay. Dapat taposon na sab ang politikanhong panagbingkil-panag-away panahon sa kampaniya ug ang tiunay'ng pagserbisyo ngadto sa katawhan maoy tutokan sugod gayod sa Hunyo 30, 2025, ang unang adlaw sa pagtuman unsay tam-is kaayo ninyong gisaad ngadto sa katilingban.

Timan-i. Ang pundok-lungsod-nasud nga nagkatibulaag-wala magkahiusa, nahisama ra sa usa ka dakong bangka kang kansang mga sakay nagkaambihas lang ang direksiyon sa pagpamugsay, dili gayod makadunggo sa gitinguhang destinasiyon. Unta, tanang mangangalad sa Kapitolyo dili mahisama kanila.

In fairness, daghang maayong nabuhat si Gwen sa pagpalambo sa probinsiya sa Sugbo. Apan aduna puy pipila nga nakasamad sa kasingkasing sa katawhan.

Nga posibleng maoy nakaparot niya sa miaging eleksiyon. Hinungdan, nga si Gov. Pam, a woman coming from behind and nowhere, maoy midaog.

Sa unang adlaw pa lang sa iyang pagtrabaho, mipirma-pagawas dayog 12 ka executive order (EO) nga alang gayod sa kaayohan sa katawhan.

Ang iyang saad nga magtukod og ospital sa kalungsoran ug paghimog libre sa mga pansayan sa tanang pampublikong terminal, apil na sa maong EO. Busa, miliyamar og igong pundo pinansiyal gikan sa mga hingtungdan opisyal nga tig-aprobrar niini alang sa katumanan sa naasoyng mga proyekto.

Unta, tahoron sa tanang mangangalagad, kinsa ubos sa hurisdiksiyon sa Kapitolyo ang tingog sa katawhan nga maoy nakapa-gobernador ni Pam. Ug sanglit, si Gov. Pam na man maoy ilang labaw, unta todo suporta-kooperasiyon gikan sa ilang dughan maoy mopatigbabaw.

Atong bantayan!