EDITORYAL - Data Privacy Law

Unsa man gyud ka importante kaning pagkolekta og impormasyon sa mga online platforms sa mga users niini?

Nganong naa man gyuy fill-upan nga mga porma nga dili lang pangalan, picture, address, ang pangayoon kondili hasta gyud ang ngalan sa mga ginikanan, dunay uban apil pa mga igsuon ug labaw sa tanan, dunay uban nga retinal scan ug electronic signature gyud ang pangayuon gikan sa user.

Ang maong requirement sa mga online platforms o online transactions matud pa gikinahanglan aron daw masiguro nga tinuod nga tawo ug dili robot o usa ka malware ang user.

Sa panahon karon sa digital age ug artificial intelligence, nanagana na ang mga online platforms o digital companies para sa ilang seguridad ug proteksyon.

Anang puntoha makasabot ta. Apan unsa may kasigurohan nga maprotektahan sab ang mga users gikan anang mga cyber criminals nga nanggamit sa mga personal nga impormasyon sa mga users?

Kanang makolektang mga personal nga impormasyon, unsa may garantiya sa mga users nga dili kini gamiton sa laing katuyoan nga supak sa ilang kabubut-on?

Unsa man kaprotektado ang ilang mga datus gikan sa mga hackers nga 24/7 nga nangita og biktima pinaagi sa online?

Dili tiaw ang mabiktima sa identity theft, daghan ng mga kinabuhi ang naguba tungod ani, sila maoy gigukod sa balaod kay sa mata sa mga imbestigador sila maoy nihimo sa krimen.

Gani bisan ang celphone numbers karon gigamit na sa mga hackers aron makasulod sa accounts sa users.

Ang Pilipinas adunay Data Privacy Law, apan dili kini garantiya nga proteksyon, kasagaran sa mahitabo, ang balaod magamit lang kun duna nay nabiktima.

 Dili na mapugngan ang digital age, kinahanglan nga mosabay ang mga Pilipino niini para sa kalamboan. Apan kinahanglang protektahan sila nga dili mabiktima.

Hustong edukasyon bahin ani ang kinahanglan, apil sa itudlo ang bahin sa mga benepisyo ug risgo sa matag hatag nila sa ilang mga personal nga impormasyon diha sa online platforms.