Gi-harass sa giutangan online

Dear Atty. Divine,

Aduna koy problema labot sa akong giutangan online. Ang akong principal nga utang P25 mil pesos ra, apan miabot na kini karon og P50 mil pesos tungod sa ilang taas nga interest nga gipatong. Karon ila na kong gisugdan og harass, pinaagi sa pag-send og mga messages nga naghulga nako nga aduna na koy warrant of arrest, ila daw ko ipapriso ug karon nagsugod na sila og post sa social medial ug ila ko gihinghanlan nga scammer. Na stress na gyud ko pag-ayo aning ilang gibuhat kay hasta akong parents ila nang gikontak. Unsay may angayan nako nga buhaton aron mahunong ning ilang pangpang harass nako? Daghang salamat. —Jimmy

Dear Jimmy,

Kining mga lending company lakip na ang mga mobile lending app kinahanglan na silang moparehistro sa Securities and Exchange Commission (SEC) basi sa Lending Company Regulation Act of 2007, busa ang motan-aw sab kanila kun nakatuman ba sila sa balaod mao ang SEC. Ang SEC usab maoy mo-imbestigar og mga reports kun aduna ba silay mga violations nga nahimo sa balaod lakip na kining ilang pagpahamtang og mas taas nga interest rate, mga hidden charges ug abusive collection practices. Ang maayo nimong buhaton karon mao ang pagpasaka og reklamo ngadto sa SEC batok sa maong online lending company og imong idetalye ang ilang gibuhat batok kanimo ug imo sab nga ilakip sa imong complaint ang kopya sa imong mga ebidensiya batok sa mga agent sa maong lending app aron sila mapatawag og ma-imbestigar. Thank you and God bless. Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.